ცესკო-სთან დაკავებული 19 პირიდან 3 გაათავისუფლეს, 2-ს 5-დღიანი პატიმრობა შეუფარდეს

region
ავტ.: region ნოემბერი 9, 2020 20:11

ცესკო-სთან დაკავებული 19 პირიდან 3 გაათავისუფლეს, 2-ს 5-დღიანი პატიმრობა შეუფარდეს

ცენტრალურ საარჩევნო კომისიასთან დაკავებული 19 პირიდან 3, მათ შორის საქართველოს უნივერსიტეტის რექტორი კოკა თოფურია 3-3 ათასი ლარით დააჯარიმეს, 2 პირს 5-დღიანი პატიმრობა შეუფარდეს, დანარჩენი 14 პირის სასამართლო პროცესი კი ამ დრომდე გრძელდება.

შინაგან საქმეთა სამინისტროს განცხადებით, აქციის 19 მონაწილე საზოგადოებრივი წესრიგის დარღვევისა და კანონიერი მოთხოვნის დაუმორჩილებლობის ბრალდებით დააკავეს.

ცესკო-სთან მყოფი დემონსტრანტები თამარ ჟვანიას გადადგომას და ხელახალი არჩევნების დანიშვნას მოითხოვდნენ. მშვიდობიან მომიტინგეებს საარჩევნო კომისიის შენობასთან სპეციალური დანიშნულების მრავალრიცხოვანი რაზმი დახვდა. სამართალდამცველებმა წინასწარი გაფრთხილების გარეშე, მომიტინგეების ნაწილს წყლის ჭავლი მიუშვირეს, რის შედეგადაც აქციის რამდენიმე მონაწილე დაშავდა.

პოლიტიკური ლიდერებისა და პარლამენტის აქციიდან მომავალი დანარჩენი მომიტინგეების ადგილზე მისვლის შემდეგ კი, სპეცრაზმელებმა წყლის ჭავლი კიდევ ერთხელ გამოიყენეს. მომიტინგეებთან ერთად დაშავდნენ სხვადასხვა ტელევიზიის, მათ შორის, ფორმულას ჟურნალისტებიც.

თვითმხილველების მტკიცებით, სპეცრაზმელებმა ცრემლსადენი გაზიც გაუშვეს, თუმცა შსს-ში ინფორმაციას უარყოფენ.

ქართული ოცნების ერთ-ერთმა ლიდერმა მამუკა მდინარაძემ ჟურნალისტებს განუცხადა, რომ ცესკო-სთან მყოფი დემონსტრანტების მხრიდან “მყისიერი თავდასხმა” ხორციელდებოდა, ამიტომ, მისი თქმით, წყლის ჭავლის გამოყენებამდე მომიტინგეთა გაფრთხილებას სამართალდამცველები ვერ მოასწრებდნენ.

მდინარაძის შეფასების საწინააღმდეგოდ, სახალხო დამცველმა ნინო ლომჯარიამ განაცხადა, რომ ცესკო-სთან მიმდინარე აქციაზე ძალის გამოყენების საჭიროება არ არსებობდა. მისი თქმით, ცივ კლიმატურ პირობებში მომიტინგეების წინააღმდეგ წყლის ჭავლის მიშვება სასტიკი ზომაა.

დარბეულ ოპოზიციას მკაცრად დასჯით დაემუქრა პარლამენტის ყოფილი თავმჯdომარე ირაკლი კობახიძე. მისი თქმით, ოპოზიციის წარმომადგენლები შტურმის მოწყობას ცდილობდნენ.

“შტურმის მოთავეები არიან ნიკანორ მელია და მისი ზონდერჯგუფები. ვაფრთხილებთ მათ, რომ თითოეული მათგანი კანონის მთელი სიმკაცრით აგებს პასუხს”, – განაცხადა კობახიძემ მომიტინგეთა დარბევის პარალელურად გამართულ სპეციალურ ბრიფინგზე.

region
ავტ.: region ნოემბერი 9, 2020 20:11