ცენტრალური საარჩევნო კომისია განცხადებას ავრცელებს

ცენტრალური საარჩევნო კომისია განცხადებას ავრცელებს. გავრცელებულ ინფორმაციაში ცენტრალური საარჩევნო კომისიის დელეგაციის ყირგიზეთში ვიზიტზეა საუბარი და და ნათქვამია, რომ აღნიშნული თემის „არასწორი ინტერპრეტაციით კონკრეტული მედია საარჩევნო ადმინისტრაციის დისკრედიტაციასა და ამომრჩევლის შეცდომაში შეყვანას ცდილობს“.

„როგორც ცნობილია, 28 ნოემბერს ყირგიზეთში პარლამენტის არჩევნები გაიმართა, რომელსაც საქართველოს დელეგაცია ცესკოს თავმჯდომარის ხელმძღვანელობით დააკვირდა.

დელეგაციაში შედიოდნენ ცესკოს თავმჯდომარის მოადგილე (რომელიც ცესკოში „ლელო საქართველოსთვის“ მიერ დანიშნული წევრია), პოლიტიკური გაერთიანებების „გიორგი ვაშაძე – სტრატეგია აღმაშენებლისა“ და „გირჩის“ მიერ დანიშნული წევრები, ასევე პარლამენტის მიერ არჩეული ცესკოს წევრი.

ტელეკომპანია „მთავარის“ ეთერში გასულ სიუჟეტში გამოყენებულია ცესკოს თავმჯდომარის გიორგი კალანდარიშვილის კომენტარი ყირგიზეთში ჩატარებული არჩევნების შესახებ, თანამედროვე ტექნოლოგიების გამოყენების ჭრილში. სწორედ ეს კომენტარი გახდა მანიპულაციისა და დისკრედიტაციის საგანი. განვმარტავთ, რომ ყირგიზეთი წლებია არჩევნებში იყენებს ელექტრონულ ტექნოლოგიებს, რომელიც საქართველოში საპილოტე რეჟიმში განხორციელდა, მათ შორის, ხმის დათვლის კორეული ელექტრონული სხვადასხვა მოდიფიკაციის აპარატი და ამომრჩეველთა ვერიფიკაციის ტექნოლოგიური საშუალებები. საქართველოს საარჩევნო ადმინისტრაცია ამ ეტაპზე განიხილავს ელექტრონული ტექნოლოგიების საარჩევნო პროცესში უფრო ფართოდ გამოყენების შესაძლებლობებს. ალბათ სადავო არ უნდა გახდეს ყველა იმ ქვეყნის გამოცდილების გაანალიზება, რომელიც არჩევნებში ელექტრონულ ტექნოლოგიებს იყენებს, იმ დადებითი თუ უარყოფითი მხარეების შესაფასებლად, რაც ტექნოლოგიების დანერგვას შეიძლება მოჰყვეს. შესაბამისად, გიორგი კალანდარიშვილმა ყირგიზეთში ჩატარებული არჩევნების შეფასებისას ყურადღება სახელდობრ ტექნოლოგიების გამოყენების ასპექტზე გაამახვილა. ამასთან, კიდევ ერთხელ აღვნიშნავთ, რომ ასეთი ტიპის ვიზიტები, სხვადასხვა ქვეყანაში არჩევნებზე დაკვირვება ორიენტირებულია სწორედ გამოცდილების ურთიერთგაზიარებაზე და სხვადასხვა ქვეყნის პრაქტიკის გაცნობაზე.

სამწუხაროდ, სიუჟეტში აშკარად იკვეთება ზოგადად არჩევნებში ელექტრონული ტექნოლოგიების გამოყენების დისკრედიტაციის მცდელობაც, რამაც, შესაძლოა სამომავლოდ ამომრჩევლებში ელექტრონული ტექნოლოგიების დანერგვისადმი უნდობლობას და უარყოფითი დამოკიდებულების გაჩენას შეუწყოს ხელი, რაც ასევე მიუღებელია“,- აღნიშნულია გავრცელებულ ინფორმაციაში.

წინა სტატიაში“სამწუხაროდ, „ნაციონალური მოძრაობა“ კვლავ პიროვნული კულტის ქვეშ არის, თავის წინამძღოლს საპროტესტო აქციასაც კი დაბადების დღეზე უანონსებენ”
შემდეგი სტატიასაქართველოს საგარეო უწყება – მოსკოვში, 3+3 ფორმატის შეხვედრაზე წარმოდგენილი იყო საქართველოს დროშა, რაც ჩვენთვის მიუღებელია