საპარლამენტო უმრავლესობა თამაზ მეჭიაურის განცხადებას გამოეხმაურნენ. მეჭიაურის განცხადებით, ამ მოცემულობით ნატოში გაწევრიანებას მხარს არ უჭერს. მისივე თქმით, ნატოს წვრთნები საქართველოს ტერიტორიაზე ჩვენი ქვეყნისთვის საფრთხის შემცველია. მმართველ გუნდში აცხადებენ, რომ ეს არის ერთი კონკრეტული დეპუტატის მოსაზრება.
„ვერანაირი ცალკეული დეპუტატის აზრი ჩვენი ქვეყნის არჩევანზე ვერ მოახდენს გავლენას, ეს არის მტკიცე, ეს ემყარება ჩვენი მოსახლეობის არჩევანს, წარსულს, მენტალიტეტს,“- განაცხადა ირაკლი სესიაშვილმა.
მანანა კობახიძის თქმით, ნებისმიერ დეპუტატს უფლება აქვს ინდივიდუალური პოზიცია დააფიქსიროს.
ნაციონალურ მოძრაობაში კი მიაჩნიათ, რომ მეჭიაურის განცხადება საგანგაშოა. სერგო რატიანმა მეჭიაურის განცხადებას შემაშფოთებელი და ანტიდასავლური განცხადება უწოდა.
თავისუფალი დემოკრატების ლიდერის, ირაკლი ალასანიას თქმით, ნატოსკენ სვლა საქართველოს უსაფრთხოებას ხელს შეუწყობს.
