სერგეი და იულია სკრიპალების ქიმიური იარაღით მოწამვლის საქმეში ანატოლი ჩეგიპასა და ალექსანდრე მიშკინის გარდა, სავარაუდოდ, მესამე პირიც მონაწილეობდა – რუსული სამხედრო დაზვერვის ოფიცერი, რომელიც ბრიტანეთში სერგეი ფედოტოვის სახელით შევიდა – The Telegraph-ი წერს. გამოცემის ინფორმაციით, 45 წლის ფედოტოვი ჩეგიპასა და მიშკინთან ერთად 2018 წლის 2 მარტს ჩავიდა სამეფოში და მათთან ერთად უნდა დაბრუნებულიყო მოსკოვში, თუმცა, გაურკვეველი მიზეზებით, რეგისტრაცია გადადო და ბრიტანეთში კიდევ რამდენიმე დღით დარჩა. სკრიპალების საქმეში მესამე ეჭვმიტანილზე რამდენიმე თვის წინ დაიწერა. რუსულმა Fontanka.ru-მ კი მისი სახელიც გამოაქვეყნა. ლონდონში რუსეთის საელჩომ The Telegraph-ის სტატიას “მორიგი ინფორმაციული გამოხტომა” უწოდა.
რუსეთის დაზვერვის ყოფილი ოფიცერი სერგეი სკრიპალი და მისი ქალიშვილი სოლსბერიში 2018 წლის მარტში მოწამლეს.