ბრიტანეთის პარლამენტის რამდენიმე დეპუტატმა, ე.წ. “პანამური დოკუმენტების” სკანდალთან დაკავშირებით, ქვეყნის პრემიერის, დევიდ კემერონის გადაყენება მოითხოვა – The Mirror წერს.
ლეიბორისტმა ჯონ მანმა პრემიერს “პირფერი” უწოდა. “კემერონს 6 წელი ჰქონდა იმისათვის, რომ პარლამენტისა და ხალხისათვის სიმართლე ეთქვა. მან ეს არ გააკეთა” – დაწერა მანმა “ტვიტერის” საკუთარ გვერდზე.
ლიბერალური დემოკრატების ლიდერმა ტიმ ფარონმა განაცხადა, რომ ბრიტანეთის მოქალაქეებს “უფლება აქვთ იცოდნენ მეტი, ვიდრე ნახევარი სიმართლე. პრემიერ-მინისტრი რამდენიმე დღის მანძილზე ოფშორებში მონაწილეობას უარყოფდა და თავი გამოიძვრინა” – განაცხადა დეპუტატმა.
დევიდ კემერონმა ოფშორების შესახებ პირველი კომენტარის გაკეტებისას განაცხადა, რომ მას არაფერი აკავშირებს “პანამურ დოკუმენტებში” აღნიშნულ მისი მამის კომპანიასთან და რომ ის მხოლოდდამხოლოდ პრემიერის ანაზღაურებით ცხოვრობს. 7 აპრილს კი გაერთიანებული სამეფოს მთავრობის ხელმძღვანელმა განაცხადა, რომ მას მამის ოფშორულ კომპანია Blairmore Holdings-ში მთავრობაში მოსვლამდე აქციები ჰქონდა. მან ასევე აღნიშნა, რომ 2010 წელს თანამდებობაზე მოსვლამდე მან საკუთარი აქციები 30 ათას ფუნტ სტერლინგად გაყიდა.
შეგახსენებთ, რომ 3 აპრილს საერთაშორისო ჟურნალისტ-გამომძიებელთა კონსორციუმმა ე.წ. “პანამური დოკუმენტი” გამოაქვეყნა, სადაც ათობით ადამიანის და კომპანიის მიერ არადეკლარირებული ქონების შესახებ არის ინფორმაცია მოცემული.
