დიდ ბრიტანეთში კორონავირუსით დაავადებულთა რაოდენობა ზამთრის სტატისტიკას მიუახლოვდა, გარდაცვლილთა რაოდენობა კი მარტის შემდეგ ყველაზე მაღალია. ამავე დროს, ეს ბევრად ნაკლებია, ვიდრე ზამთრის ეპიდემიის მაჩვენებელი, მიუხედავად, დაავადებულთა იგივე რაოდენობისა – “სკაი ნიუსი” ავრცელებს.
მაისში დაავადებულთა მინიმალური რაოდენობის შემდეგ – დაახლოებით 2 ათასი შემთხვევა დღე-ღამეში – უკანასკნელი 24 საათის განმავლობაში 46 558 შემთხვევა დაფიქსირდა, მათგან 96 პაციენტი გარდაიცვალა. მათი ასაკობრივი ჯგუფი არ არის მითითებული. გასულ პარასკევსა და შაბათს დღე-ღამეში დაავადებულთა რაოდენობამ 50 ათასს გადააჭარბა.
ზამთარში, პიკში გარდაცვლილთა რაოდენობა 24 საათში ათასს აჭარბებდა.
იმის მიუხედავად, რომ კოვიდ-19-ით დააავდებულთა რაოდენობა იზრდება და შესაძლებელია მალე მეოთხე ტალღაც დაიწყოს, ბორის ჯონსონი ვარაუდობს, რომ ახალი ლოკდაუნის თავიდან აიცილებენ.
ბრიტანეთის 66,6 მილიონიანი მოსახლეობიდან ორივე დოზა ვაქცინა 36,2 მილიონ პირს აქვს გაკეთებული.