ბრიტანელ ჟურნალისტს უილ ნილს, რომელიც საქართველოში 2022 წლიდან ცხოვრობს, დიდ ბრიტანეთში და ევროკავშირში ვიზიტის შემდეგ საქართველოში ხელახალი შესვლა აეკრძალა.
„რეპორტიორები საზღვრებს გარეშე“ დაგმო გადაწყვეტილება, როგორც თვითნებური და პოლიტიკურად მოტივირებული და მოუწოდებს მის დაუყოვნებლივ გაუქმებას. უფლებადამცველები აცხადებენ, რომ ეს საქმე კიდევ ერთი მტკიცებულებაა საქართველოში პრესის თავისუფლების მხრივ გაუარესებული მდგომარეობის შესახებ.
“ჟურნალისტის წინააღმდეგ სანქცია მოჰყვა მასობრივ სიძულვილის კამპანიას, რომელიც აპრილის დასაწყისში დაიწყო მას შემდეგ, რაც მისი გამოძიება ბრიტანულ გამოცემა Byline Times-ში გამოქვეყნდა. სტატიაში განხილული იყო ბრიტანული ფონდის Hunnewell Partners-ისა და რუსი ოლიგარქის, რომან აბრამოვიჩის კავშირები, რომელიც ევროკავშირის სანქციების ქვეშაა. Hunnewell, სავარაუდოდ, ბიძინა ივანიშვილთან არის დაკავშირებული და ფლობს ქვეყნის უდიდეს პროსამთავრობო ტელეარხ „იმედს“.
გამოქვეყნების შემდეგ, „ქართული ოცნების“ წარმომადგენლებმა განაცხადეს, რომ ნილი დაკავშირებული იყო „დიფ სთეითთან“, რომელიც საქართველოს ინტერესების საწინააღმდეგოდ მოქმედებდა. „იმედმა“ ჟურნალისტი მიკერძოებაში დაადანაშაულა, აჩვენა მისი ვიზიტის კადრები ოპოზიციური პარტიის შტაბ-ბინაში და გაავრცელა დაუდასტურებელი ინფორმაცია მისი საქმიანობის შესახებ.
საქართველოში პრესის თავისუფლების მდგომარეობა კვლავ უარესდება, განსაკუთრებით 2024 წლის ოქტომბრის სადავო საპარლამენტო არჩევნების შემდეგ. მხოლოდ ბოლო თვეებში, ფრანგი ჟურნალისტები კლემენტ ჟირარდო და ჟერომ შობო, ჩეხი რეპორტიორი რეი ბეისელი და შვეიცარიელი სტეფან გოსი იძულებულნი გახდნენ დაეტოვებინათ ქვეყანა” – აღნიშნავს RSF.
