“ბოკერიას ურჩევნია, თავის ბიოგრაფიას ჩახედოს,მისი პოზიციები ასეთი თავხედური როდის გახდა”

გიგა ბოკერიას ურჩევნია, თავის ბიოგრაფიას ჩახედოს, ვის მიერ არის გათავხედებული და მისი პოზიციები ასეთი თავხედური როდის გახდა, – ამის შესახებ ჟურნალისტებს საპარლამენტო უმრავლესობის წევრმა, ნუკრი ქანთარიამ განუცხადა, რომელიც ფილმის “და ჩვენ ვიცეკვეთ” პრემიერასთან დაკავშირებით დაგეგმილ საპროტესტო აქციაზე გიგა ბოკერიას განცხადებას გამოეხმაურა.

ქანთარიას თქმით, ბოკერიას ურჩევნია, თავის ბიოგრაფიას გადაავლოს თვალი, ვიდრე სიბრძნეები აფრქვიოს.

„მისი გათავხედება საიდან დაიწყო, საზოგადოება ხედავს. ალბათ, გახსოვთ, გასულ წლებში, ვის მიერ იყო აღზევებული. რაც შეეხება აქციას, პროტესტის გამოთქმას ვერავის დავუშლი, ზოგს რა მოსწონს, ზოგს – რა. პროტესტის საფუძველი არსებობს, მაგრამ ეს უხეშ ჩარევად და პროტესტად არ უნდა გადაიქცეს, რომელიც კანონს გაცდება. ნებისმიერი ნაწარმოები, რომელიც არ მოგწონს და ამაზე ბევრს ხმაურობ, სხვა დონეზე აგყავს, რეკლამას უკეთებ და საზოგადოებას უფრო აინტერესებს. ასეთ შემთხვევაში მაყურებლის მხრიდან იგნორი ხდება და ეს არის დიდი პროტესტი და არა ის, როცა ამაზე ხმაური მიდის. არ ვიტყოდი, ამ ადამიანებზე შავრაზმული, მათ ფერს ვერ დავარქმევდი. მათ სწამთ, რომ ასეთი ჩარევა საჭიროა. ასეთი ჩარევა ხელს უწყობს ფილმის მიმართ ინტერესს”, – განაცხადა ქანთარიამ.

ოპოზიციონერი დეპუტატი გიგა ბოკერია მიიჩნევს, რომ ყველა ჯგუფი და მათ შორის სასულიერო პირთა ნაწილი, რომელიც ფილმის „და ჩვენ ვიცეკვეთ“ წინააღმდეგ კამპანიას აგორებს, არის ჩვეულებრივი პროპუტინისტური ფაშისტი და საქართველოს თავისუფლების მტერი.

„ეს ხალხი ივანიშვილის პოლიტიკის შედეგად გათავხედდა“, – განაცხადა ბოკერიამ

banner
წინა სტატიაში“თუ ფილმის ჩვენება არ აღიკვეთება, პროტესტს ხელისუფლების წინააღმდეგ მივმართავთ”
შემდეგი სტატიაამერიკელი კონგრესმენები საოკუპაციო ხაზთან იმყოფებოდნენ