ბიძინა ივანიშვილი : ლარმა ჯანსაღად აჩვენა საკუთარი თავი სწორი ეკონომიკის პირობებში

საქართველოს ყოფილი პრემიერ-მინისტრის ბიძინა ივანიშვილის შეფასებით, ისეთი ეკონომიკური ზრდის ტემპი, რაც საქართველოს ახალი ხელისუფლების პირობებში აქვს, არასდროს ჰქონია. ამის შესახებ ივანიშვილმა გურიაში, რეგიონულ ჟურნალისტებთან შეხვედრაზე განაცხადა. მისი თქმით, იმ კრიზისის პირობებში, რაც რეგიონსა და ევროპაშია, საქართველო ეკონომიკური ზრდის ტემპით ლიდერი სახელმწიფოა.

”ეკონომიკური ზრდის ტემპი შესაძლოა არ არის მომხიბლავი დღეს როგორიც იყო ახალი ხელისუფლების მოსვლის შემდეგ 4 წლის განმავლობაში, თუმცა, შეგახსენებთ, რომ ჩვენ ვართ ლიდერები ეკონომიკური ზრდის ტემპით, რომელიც არასდროს ყოფილა წინა ხელისუფლების დროს. როდესაც რეგიონში არის კრიზისი, როდესაც ევროპაშია კრიზისი, იქ ქვეყანა ვერ გაიზრდება ძალიან მაღალი ტემპებით, მაგრამ ამ პროცესში საქართველო არის ლიდერი ზრდის ტემპებით”, – განაცხადა ივანიშვილმა.

მისივე თქმით, ქვეყანა ვალების ეკონომიკიდან გადავიდა ინვესტიციების ეკონომიკაზე.

”კორუფცია ნულამდეა დასული. სამუშაო ადგილები 2006-12 წლამდე 23 000-ით შემცირდა და ქვეყნიდან გადინების ტემპი იყო ძალიან მაღალი. ჩვენი მოსვლის შემდეგ სამუშაო ადგილები გაიზარდა დაახლოებით 65 000-ით. ამავდროულად, ეს არ გაზრდილა სახელმწიფო სტრუქტურების ხარჯზე, პირიქით, სახელმწიფო სტრუქტურებში დასაქმებულთა რაოდენობა შემცირდა. ვალების ეკონომიკიდან გადავედით ინვესტიციების ეკონომიკაზე. ლარის კურსი ახალი ვალებით რეგულირდებოდა. ნახეთ ახლა როგორი მცურავი კურსი დავიჭირეთ და რა მოხდა რეგიონებში. ლარმა ჯანსაღად აჩვენა საკუთარი თავი სწორი ეკონომიკის პირობებში, რაც საოცრად ძნელი მისაღწევი იყო. როდესაც რეგიონი არის კრიზისში, იქ რომელიმე ქვეყანა ვერ იქნება სუპერწარმატებული, მაგრამ ამ პირობებში ჩვენ ვართ ლიდერები”, – აღნიშნა ივანიშვილმა.

banner
წინა სტატიაშიბიძინა ივანიშვილი : არ იფიქროთ, რომ 2030 წელს ქუჩაში გახვალთ და გაჭირვებულს ვერ იშოვნით, ან მათხოვარს ვერ დაინახავთ
შემდეგი სტატიადავით სერგეენკო „რუსთავი2“-ზე – ვფიქრობ, სასამართლო მიიღებს იმ გადაწყვეტილებას, რომელიც მიმართული იქნება დავის სამართლიანი გადაწყვეტილებისკენ