უხვმა ნალექმა ბათუმში გადაადგილების პრობლემები შექმნა. ძლიერი წვიმის შედეგად ქალაქის რამდენიმე ცენტრალური და პერიფერიული ქუჩა დაიტბორა.
წყლის უხვი ნაკადი დაგროვდა აღმაშენებლის, კობალაძის, ხიმშიაშვილისა და აბუსერიძის ქუჩებზე.
სავალ ნაწილზე წყლის მაღალი დონის გამო, შეფერხდა საავტომობილო მოძრაობა, რაც გადაადგილებას როგორც მძღოლებისთვის, ისე ქვეითებისთვის სერიოზულად აფერხებს.
ადგილობრივები აცხადებენ, რომ უხვი ნალექის დროს აღნიშნული ტერიტორიების დატბორვა ქრონიკულ ხასიათს ატარებს. მოქალაქეები ბათუმის მერიას მიმართავენ და სანიაღვრე არხების დროულად მოწესრიგებასა და ინფრასტრუქტურული პრობლემის საბოლოოდ მოგვარებას ითხოვენ.
