ბაქოში ამტკიცებენ, რომ სომხური მხარის მიერ გავრცელებული დაღუპული აზერბაიჯანელი სამხედრობის ფოტოები ფალსიფიცირებულია და სინამდვილეში დონბასის სამხედრო მოქმედებებისას არის გადაღებული – ამის შესახებ აზერბაიჯანის თავდაცვის სამინისტროს პრეს-ცენტრის ხელმძღვანელმა, ვაგიფ დარგლიახმა დღეს განაცხადა.
„ეს ფოტოები არ ეხება აზერბაიჯანულ სპეცრაზმს. ისინი ორი-სამი წლის წინ აღმოსავლეთ უკრაინაში მიმდინარე საომარი მოქმედებების დროს არის გადაღებული და ახლა სომხები ავრცელებენ სოციალურ ქსელებში“ – განაცხადა პრეს-ცენტრის ხელმძღვანელმა. ფოტოები, რომელზეც საუბარია, სომხეთის თავდაცვის სამინისტროს პრეს-მდივანმა არცრუნ ოვანისიანმა „ფეისბუქის“ საკუთარ გვერდზე დღეს გაავრცელა. ფოტოებზე დაახლოებით 10 დაღუპულია გადაღებული. „ეს აზერბაიჯანის სპეციალური დანაყოფებია“ – ფოტოეს ასეთი წარწერა ახლავს თან.