აშშ-ის პრეზიდენტის დონალდ ტრამპის ადმინისტრაციამ უკრაინას სასარგებლო წიაღისეული რესურსების შესახებ შეთანხმების პროექტის ახალი, „გაუმჯობესებული“ ვერსია გაუგზავნა, რომელიც კიევის ზოგიერთ შენიშვნას ითვალისწინებს და რომელსაც გაფორმების მეტი შანსი აქვს. ამის შესახებ გამოცემა Axios უკრაინისა და შეერთებული შტატების ოფიციალურ პირებზე დაყრდნობით იუწყება.
წყაროების ცნობით, ბოლო დღეების განმავლობაში უკრაინულ და ამერიკულ მხარეებს შორის „წიაღის შესახებ შეთანხმებაზე“ მოლაპარაკებები გაგრძელდა და შეერთებულმა შტატებმა უკრაინას წარუდგინა განახლებული პროექტი, რომელიც კიევის ზოგიერთ შენიშვნას ითვალისწინებს.
ერთ-ერთმა წყარომ დააკონკრეტა, რომ შეთანხმებიდან ამოიღეს ზოგიერთი მუხლი, რომლებმაც უკრაინული მხარის შეშფოთება გამოიწვია, კერძოდ ის, რომ დოკუმენტი ნიუ-იორკის სასამართლოს იურისდიქციას ექვემდებარება.
„უახლესი პროექტი მნიშვნელოვანი გაუმჯობესებაა და შეესაბამება უკრაინის კანონმდებლობას“, – განუცხადა წყარომ Axios-ს.
იმავე წყარომ გამოცემას განუცხადა, რომ რამდენიმე თანაშემწემ ზელენსკის მოუწოდა, ხელი მოაწეროს განახლებულ წინადადებას, რათა თავიდან აიცილოს ტრამპთან შემდგომი დაპირისპირება და საშუალება მისცეს აშშ-ის პრეზიდენტს, გაამართლოს უკრაინისთვის სამხედრო დახმარების გაგრძელება.
„ეს არის მოლაპარაკება. მოლაპარაკებებში თქვენ აღწევთ შეთანხმებას. უკრაინას სურს მოლაპარაკება მინერალებზე, ამიტომ ვსაუბრობთ ამაზე“, – განუცხადა Axios-ს თეთრი სახლის უსახელო ოფიციალურმა პირმა.
შეგახსენებთ, დონალდ ტრამპის ადმინისტრაციამ თავდაპირველად უკრაინას შესთავაზა წინადადება, რომელიც აშშ-ის მიერ უკრაინის იშვიათი სასარგებლო წიაღისეულის 50%-ის ფლობას ითვალისწინებდა, თუმცა პრეზიდენტმა ვოლოდიმირ ზელენსკიმ დოკუმენტის ხელმოწერაზე უარი განაცხადა.
ამას ზელენსკის მიმართ ტრამპის მკაცრი განცხადებები მოჰყვა. კერძოდ, მან უკრაინელ კოლეგას „დიქტატორი არჩევნების გარეშე“ უწოდა.
