აზიის განვითარების ბანკის ბორდი ავტობანის ხევი-უბისას მონაკვეთის დაფინანსებაზე გადაწყვეტილებას 27 სექტემბერს მიიღებს. ამის შესახებ ინფორმაცია საფინანსო ინსტიტუტის ვებგვერდზეა გამოქვეყნებული.
წინასწარი ინფორმაციით, პროექტისთვის 257.4 მილიონი ევროს გამოყოფა იგეგმება. ხევი-უბისას მონაკვეთზე 12.2 კმ გზის მშენებლობა იგეგმება, მათ შორის 35 ახალი ხიდის (18 ხიდი – თბილისი-არგვეთას მიმართულებით, ხოლო, 17 – არგვეთა-თბილისის მიმართულებით) და 18 გვირაბის მშენებლობა.
უკვე ცნობილია, რომ ხევი-უბისას გზის მშენებლობისთვის გამოცხადებული ტენდერით 10 კომპანია დაინტერესდა. გამარჯვებული კომპანია დონორ ორგანიზაციასთან კონსულტაციის შემდეგ გამოვლინდება.
