ავსტრიის საგარეო საქმეთა მინისტრმა კარინ კნაისლმა რუსეთის პრეზიდენტთან ვლადიმირ პუტინთან ცეკვაზე ისაუბრა და განაცხადა, რომ ანტირუსულ სანქციებს სრულიად იზიარებს – ამის შესახებ ინფორმაციას Deutsche Welle ავრცელებს.
“მე მას ვეხვეოდი, ჩვენ ვცეკვავდით. მანამდე სულ რამდენიმე მამაკაცთან მიცეკვია… ეს სპონტანურად მოხდა” – ამის შესახებ მინისტრმა პუტინის საკუთარ ქორწილში დასწრებაზე კომენტირებისას განაცხადა.
“ჩვენ მანამდეც შევხვედრილვართ. ბევრჯერ განგვიხილავს ჩვენი აზრები სხვადასხვა საკითხებზე” – თქვა კნაისლმა და აღნიშნა, რომ პუტინის დაპატიჟებას არ ნანობს.
ინტერვიუში ევროკავშირისა და რუსეთის ურთიერთობის შესახებ კომენტირებისას მინისტრმა თქვა, რომ რუსეთი მისთვის პარტნიორია: “რუსეთს განვიხილავ როგორც პარტნიორს. პრაგმატულად უნდა შევხედოთ სირიაში რუსეთთან თანამშრომლობის საკითხს” – თქვა კნაისლმა და დაამატა, რომ სრულად უჭერს მხარს ანტირუსულ სანქციებს, რომელიც უკრაინაში სეპარატისტების მხარდაჭერის გამო დაუწესდა.