გერმანული პრესის მიხედვით, დაახლოებით 55 ათასმა მიგრანტმა გერმანია საკუთარი სურვილით დატოვა და სამშობლოში დაბრუნდა – გერმანიაში მიგრაციისა და ლტოლვილთა საქმეების ფედერალურ სამმართველოზე დაყრდნობით წერს Sueddeutsche Zeitung-ი.
გაზეთის მონაცემებით, იმ მიგრანტების უმეტესობა, რომლებმაც გერმანია დატოვეს, ბალკანელები არიან, რომელთაც ლტოლვილის სტატუსის მიღების შანსი არ ქონდათ – ამდაგვარად, მათ თავი დეპორტაციას აარიდეს.
ამასთანავე, 2016 წელს გერმანიამ 25 ათასი ადამიანი გაადეპორტა.
საკუთარი ნებით სამშობლოში დაბრუნებულებიდან 15 ათასი ალბანელია, 5 ათასი კი – სერბი, ერაყელი და კოსოვოელი.
Sueddeutsche Zeitung-ის ცნობით, გაზრდილია იმ ადამიანების რიცხვი, რომლებსაც დაბრუნება სურთ ავღანეთში, ერაყსა და ირანში. გარკვეულწილად, სახლში დაბრუნების სურვილი გამოწვეულია იმით, რომ გერმანია მათ საკუთარ სამშობლოში ფინანსურ დახმარებას პირდება.
