ნიგერიის პრეზიდენტმა, ბოლა ტინუბუმ დაადასტურა „ისლამური სახელმწიფოს“ ერთ-ერთი მაღალჩინოსანი ლიდერის ლიკვიდაცია აშშ-სთან ერთობლივი ოპერაციის შედეგად.
„ჩვენმა შეუპოვარმა ნიგერიის შეიარაღებულმა ძალებმა, ამერიკის შეერთებული შტატების შეიარაღებულ ძალებთან მჭიდრო თანამშრომლობით, ჩაატარეს გაბედული ერთობლივი ოპერაცია, რომელმაც მძიმე დარტყმა მიაყენა „ისლამური სახელმწიფოს“ რიგებს“, — აღნიშნულია ტინუბუს განცხადებაში.
ოპერაციის შესახებ პირველად აშშ-ის პრეზიდენტმა, დონალდ ტრამპმა გამოაცხადა, რომელმაც აბუ-ბილალ ალ-მინუკი აღწერა, როგორც „ISIS-ის რიგით მეორე ლიდერი გლობალურად“ და „ყველაზე აქტიური ტერორისტი მსოფლიოში“.
ვაშინგტონმა ალ-მინუკი „განსაკუთრებული კატეგორიის გლობალურ ტერორისტად“ 2023 წელს გამოაცხადა.
ეს მკვლელობა „ისლამური სახელმწიფოსთვის“ (IS) მორიგ მნიშვნელოვან დარტყმას წარმოადგენს მისი ლიდერის, აბუ ბაქრ ალ-ბაღდადის 2019 წლის ლიკვიდაციის შემდეგ.
ტინუბუმ განცხადებაში აღნიშნა, რომ ალ-მინუკი „თავის რამდენიმე თანამებრძოლთან“ ერთად ჩადის ტბის აუზში, მის რეზიდენციაზე მიტანილი იერიშის დროს მოკლეს.
ნიგერიის სამხედრო უწყების განცხადებით, ეს „მაღალი სიზუსტის ოპერაცია“ შესაძლებელი გახდა „ახლახან ჩამოყალიბებული აშშ-ნიგერიის პარტნიორობისა და დაზვერვის სფეროში ინფორმაციის გაცვლის ძალისხმევით“.
მათივე ცნობით, ალ-მინუკი დაწინაურებული იყო „ოლქების გენერალური დირექტორატის ხელმძღვანელად“, რაც მას გლობალური „ისლამური სახელმწიფოს“ იერარქიაში ერთ-ერთ ყველაზე მაღალჩინოსან ფიგურად აქცევდა.
