ტრამპის ადმინისტრაციამ მკაფიოდ განაცხადა, რომ შეერთებული შტატები სიტყვის თავისუფლებას მიიჩნევს ფუნქციონირებადი საზოგადოების ფუნდამენტურ საფუძვლად და ჩვენ მტკიცედ ვეწინააღმდეგებით ცენზურასა და იმ შემზღუდავ კანონებს, რომლებიც გამოიყენება არასასურველი შეხედულებების მქონე ადამიანების ხმის ჩასახშობად, – ამის შესახებ საქართველოში აშშ-ის საელჩოს კომენტარშია საუბარი, რომელიც დიპლომატიურმა უწყებამ რადიო თავისუფლებას მისცა.
,,როგორც ეს ქართველ პარტნიორებსაც გავუზიარეთ, სტაბილურობა მოითხოვს პოლიტიკურ ოპოზიციას, რომელიც სახელმწიფო ინსტიტუტებთან მოქალაქეების სახელით თანამშრომლობს – იმ მოქალაქეებისა, რომლებმაც მათ ხმა მისცეს. პოლიტიკური სტაბილურობა, რომელიც შეხედულებების ფართო წარმომადგენლობით არის უზრუნველყოფილი, წარმოადგენს იმ ფაქტორების ნაწილს, რაც საქართველოს ამერიკული ინვესტიციებისთვის, უსაფრთხოების სფეროში თანამშრომლობისთვის და გრძელვადიანი სტრატეგიული პარტნიორობისთვის სანდო პარტნიორად აქცევს.
ჩვენ შეშფოთებულები ვართ საქართველოს მთავრობის სიძულვილის ენის წინააღმდეგ ბრძოლის განყოფილების გამო. სიცრუესა და მცდარ შეხედულებებზე საუკეთესო პასუხი მეტი სიტყვის თავისუფლებაა და არა იძულებით დამყარებული დუმილი“,- ნათქვამია საქართველოში აშშ-ის საელჩოს კომენტარში.
რადიო თავისუფლებამ აშშ-ის საელჩოს შეკითხვით 22 ივლისს მას შემდეგ მიმართა, რაც სამართალდამცავებმა სოციალურ ქსელში შალვა პაპუაშვილისა და ლადო ბოჟაძისადმი შეურაცხმყოფელი Facebook-პოსტის გამო ჟურნალისტ ვახო სანაიას 15-დღიანი პატიმრობა შეუფარდეს.
