აშშ-ის მთავრობამ საქართველოს ეროვნული პარკების დასაცავად 1,6 მილიონ დოლარი გამოყო. ინფორმაციას ამის შესახებ აშშ-ის საელჩო ავრცელებს.
როგორც განცხადებაშია ნათქვამი, პროგრამის მთავარი მიზანი საქართველოს ეროვნული პარკების შენარჩუნება და ეკონომიკური პერსპექტივების შექმნაა. არსებული ინფორმაციით, პროგრამა ხუთი წლის განმავლობაში გაგრძელდება.
გთავაზობთ აშშ-ის საელჩოს განცხადებას უცვლელად:
“საქართველოს ბუნება ფასდაუდებელია და მისი შენარჩუნება განსაკუთრებით მნიშვნელოვანია.
ქვეყნის თვალწარმტაცი ეროვნული პარკების დასაცავად და მათი ეკონომიკური მდგრადობის მისაღწევად ამერიკის მთავრობა დღეიდან იწყებს $1.6-მილიონიან, ხუთწლიან პროგრამას, რომლის მიზანიც საქართველოს ეროვნული პარკების შენარჩუნება და მათთვის ეკონომიკური შესაძლებლობების გაჩენაა.”
წინა თვეში ცნობილი გახდა, რომ თბილისში ბავშვთა ონკოლოგიური ცენტრის პროექტი აშშ-ის მთავრობამ 700 ათასი დოლარით დააფინანსა. ასევე, საიოკუპაციო ხაზის მიმდებარედ ადგილობრივების დასაქმების ხელშეწყობისთვის, აშშ-ის მთავრობამ 500 ათასი დოლარი გამოყო.
