პოლონეთის პრემიერ-მინისტრი დონალდ ტუსკი უკრაინის ქალაქებზე რუსეთის იერიშებს გამოეხმაურა და ირიბად გაკიცხა შეერთებული შტატები რუსეთ-უკრაინის ომში მისი ბოლო ნაბიჯების გამო.
„ასე ხდება, როცა ვინმე ბარბაროსებს ამშვიდებს. მეტი ბომბი, მეტი აგრესია, მეტი მსხვერპლი. კიდევ ერთი ტრაგიკული ღამე უკრაინაში“, – წერს ტუსკი X-ზე.
ინფორმაციისთვის, რუსეთმა ბალისტიკური რაკეტებით შეუტია დონეცკის ოლქის ქალაქ დობროპილიას. ბოლო მონაცემებით, დაღუპულია 11 ადამიანი, ხოლო დაშავებულთა რაოდენობა 47-მდე გაიზარდა. დაშავებულებს შორის 7 ბავშვია.
ხარკოვის ოლქში რუსების მხრიდან დაბომბვას კი სამი ადამიანი ემსხვერპლა, ხოლო შვიდი დაშავდა.
Time-ის წყაროების თანახმად, აშშ-ის გადაწყვეტილება, უკრაინისთვის სადაზვერვო ინფორმაციის გაზიარების შეწყვეტასთან დაკავშირებით, რუსეთს ფრონტის მთავარ ნაწილზე წინსვლაში დაეხმარა და გამოიწვია მრავალი უკრაინელი ჯარისკაცის სიკვდილი ბოლო დღეებში.
