ხელისუფლება ყველაფერს აკეთებს, რომ ყველა უკრაინელი პატიმარი გაცვალოს; ჩვენმა სამხედროებმა ბევრი საინტერესო პერსონაჟი შეიპყრეს, – ამის შესახებ უკრაინის პრეზიდენტის ოფისის მრჩეველმა, ალექსეი არესტოვიჩმა განაცხადა.
„ყველაფერს ვაკეთებთ, რომ ყველა გავცვალოთ. იმდენი ტყვე გვყავს და მათ შორის არიან ისეთი პერსონაჟები, რომლებზეც თითოზე 50-80 კაცს მოგვცემენ, ძალიან ღირებული“, – თქვა არესტოვიჩმა.
უკრაინის პრეზიდენტის ოფისის მრჩეველს დეტალებზე არ უსაუბრია, მაგრამ მიანიშნა, რომ ტყვეებს შორის არიან ოფიცრები, მაღალი რანგის სამხედროების ნათესავები და პოლიტიკოსები.
მანამდე ცნობილი გახდა, რომ 19 აპრილს, უკრაინას და რუსეთს შორის ტყვეების მეხუთე გაცვლა მოხდა. სახლში 76 უკრაინელი დაბრუნდა.
