ოკუპირებული ცხინვალის ციხეში წამებით მოკლული არჩილ ტატუნაშვილის საქმე – მცხეთის სასამართლო დღეს წამებისა და მკვლელობაში ბრალდებული პირების აღკვეთის ღონისძიების შეფარდებაზე იმსჯელებს. დავით გურწიევისა და ალიკ ტაბოევის მიმართ ბრალდების მუხლი გადაკვალიფიცირდა და პროკურატურა მათ 144-ე პრიმა მუხლის მესამე ნაწილით ედავება, რაც ადამიანის წამებით სიკვდილს გულისხმობს. მათ ბრალი დაუსწრებლად აქვთ წარდგენილი.
სასამართლო პროცესი 13:00 საათზე არის ჩანიშნული. ოჯახის ადვოკატი მარიამ ჯიშკარიანი იმედოვნებს, რომ სასამართლო ბრალდებულებს აღკვეთის ღონისძიების სახით პატიმრობას შეუფარდებს.
არჩილ ტატუნაშვილის წამებით მკვლელობაში ბრალდებულ ორ პირს ინტერპოლის წითელი ცირკულარითაც ეძებენ.