ჩვენ უნდა გავუხსნათ ქალებს უფრო აქტიური პოლიტიკური მოღვაწეობის შესაძლებლობა, – ამის შესახებ საქართველოს პრეზიდენტმა ავლაბრის სასახლეში გამართულ მიღებაზე განაცხადა, სადაც გენდერულ საკითხებთან დაკავშირებით თბილისში დაგეგმილი საერთაშორისო კონფერენციის მონაწილეებს უმასპინძლა.
ქვეყნის პირველმა პირმა ხაზი გაუსვა, რომ საზოგადოებრივ-პოლიტიკურ ცხოვრებაში ქალის როლის გაძლიერება პირადად მისი პოლიტიკაა, რის ფარგლებშიც არაერთ თანამდებობაზე სწორედ ქალი კანდიდატი წარადგინა.
“ჩვენ ნათლად ვხედავთ, რომ ჩვენი საზოგადოებრივ-პოლიტიკური იდენტობის ფორმირებაში ქალები, როგორც პოლიტიკოსები, როგორც საზოგადოებრივი ცხოვრების შემქმნელები უაღრესად მნიშვნელოვან როლს თამაშობენ. დღეს მე ისევ ვუბრუნდები იმ სატკივარს, რომელიც სამწუხაროდ ჩვენ დავინახეთ – ძალადობას ქალთა მიმართ. ამ ძალადობის მიმართ ქართულმა საზოგადოებამ ერთმნიშვნელოვანი ვერდიქტი გამოიტანა და ერთმნიშვნელოვნად დაგმო, მაგრამ გასააზრებელია ერთ რამ: იმისთვის, რომ ჩვენ შევქმნათ უფრო ძლიერი, უფრო მოქმედი საზოგადოება, უნდა გავუხსნათ ქალებს უფრო აქტიური პოლიტიკური მოღვაწეობის შესაძლებლობა. ჩვენ შორის არის ბევრი გამორჩეული ქალბატონი, როგორც საქართველოს პარლამენტში, ასევე მთავრობაში.
მინდა ხაზი გავუსვა იმასაც, რომ ჩემი პოლიტიკის ფარგლებში მე მუდმივად ვცდილობდი, ქალბატონები ყოფილიყვნენ იმ მნიშვნელოვან თანამდებობებზე, რომლებსაც მე წარვადგენდი. ასეთია მაგალითად უშიშროების საბჭოს მდივანი. ასევე იმ რეფორმის ფარგლებში, რომელსაც ჩვენ ვატარებთ სასამართლო სისტემის მიმართ და რომელიც უმნიშველოვანესია დღეს ქართული დემოკრატიის მშენებლობაში, ჩვენ შევძელით და ვიპოვეთ ყველაზე პრინციპული, ყველაზე კვალიფიციური და ყველაზე გაუტეხელი ქალბატონი, რომელიც წლების განმავლობაში იყო ამ სისტემაში და არასდროს შესულა არავითარ გარიგებაში არც ერთ პოლიტიკურ ძალასთან. ის დღეს ამაყად ხელმძღვანელობს უზენაეს სასამართლოს და მე ამაყი ვარ, რომ ჩვენ შევძელით ისეთი ძლიერი ქალბატონის მოძებნა, როგორიც ნინო გვენეტაძეა”, – აღნიშნა პრეზიდენტმა.
