ოკუპირებული აფხაზეთის დე ფაქტო სამხედრო პროკურატურამ სასამართლოს მიმართა შუამდგომლობით საქართველოს მოქალაქე გიგა ოთხოზორიას განზრახ მკვლელობაში ბრალდებული რაშიდ კანჯი–ოღლის მიმართ აღკვეთი ღონისძიების სახით პატიმრობის შეფარდების თაობაზე.
„კანჯი–ოღლის მიმართ გამოტანილია დადგენილება კანჯი-ოღლისთვის აფხაზეთის სისხლის სამართლის კოდექსის განზრახ მკვლელობის მუხლით ბრალდებულის სახით პასუხისგებლობის დაკისრების თაობაზე. ამასთან, იგი გათავისუფლებულია დაკავებული თანამდებობიდან უშიშროების სამსახურში”,– იუწყება „აფსნიპრესი“.
მისივე ინფორმაციით, „საგამოძიებო ორგანოს იმედი აქვს, რომ მიიღებს ბრალდების მტკიცებულებებს საქმის სასამართლოში გადასაგზავნად ოთხმხრივ კომისიაში ინციდენტების პრევენციისა და მათზე რეაგირების მექანიზმების ფარგლებში გალში“.
ამასთან, დე ფაქტო გენერალური პროკურატურა ხაზგასმით აღნიშნავს, რომ „რესპუბლიკის კონსტიტუციის თანახმად, რაშიდ კანჯი–ოღლი არ არის ცნობილი დამნაშავედ გამამტყუნებელი განაჩენის კანონიერ ძალაში შესვლის მომენტამდე“.