15 დეკემბერს აფხაზეთის ოპოზციური ბლოკის მიერ დაანონსებულმა საპროტესტო აქციამ დიდი ხმაური გამოიწვია თვითგამოცხადებული რესპუბლიკის როგორც პოლიტიკურ, ასევე საზოგადოებრივ წრეებში. ვრცელდება სხვადასხვა გაერთიანებების მიმართვები როგორც ოპოზიციური ძალების, ასევე დე-ფაქტო ხელისუფლების მისამართით, მოწოდებით, რომ მოერიდონ კონფრონტაციას და ყველა საკითხი მშვიდობიანად მოაგვარონ.
რამდენიმე საათის წინ ასეთი მიმართვა “ჩრდილოეთ ოსეთი-ალანიას” მოხალისეთა ჯგუფმა გაავრცელა, ასევე – ჩერქეზეთის აქტივისტებმა. აფხაზ ხალხს მიმართა ასევე ყაბარდო-ბალყარეთის საზოგადოებრივმა ორგანიზაციამ – ყველა ზემოთ ჩამოთვლილი ჯგუფი 1992-1993 წლების აფხაზეთის კონფლიქტში მოხალისე-მეომრების გაერთიანებაა. ისინი ე.წ. “აფხაზეთის სამამულო ომის ვეტერანების გაერთიანების” მოწოდებას უერთდებიან, რომლებიც ხალხს სიმშვიდისკენ მოუწოდებს და თავის მომხრეებს 15 დეკემბერს აფხაზეთის დე-ფაქტო რესპუბლიკის პარლამენტის წინ შეკრებისკენ მოუწოდებს, რომ მათ ოპოზიციური ბლოკის მიერ დაანინსებული აქციის კონტრაქცია გამართონ და მხარი დაუჭირონ სამთავრობო კურსს.
რამდენიმე დღის წინ აფხაზეთის დე-ფაქტო პრეზიდენტმა რაულ ხაჯინბამ სპეციალური განცხადება გაავრცელა ოპოზიციური ბლოკის მიერ დაანონსებულ საპროტესტო აქციასთან დაკავშირებით, მისი თქმით, სახელმწიფო დაგეგმილ აქციაში არ ჩაერევა.
