სახელმწიფო დაცვის სპეციალური სამსახურის ხელმძღვანელმა, ანზორ ჩუბინიძემ სასამართლოს წერილი გაუგზავნა, რომელშიც ითხოვს, სხდომაზე მისი გამოუცხადებლობა საპატიოდ ჩაითვალოს.
საბიუჯეტო თანხების გაფლანგვის საქმეზე ანზორ ჩუბინიძის დაკითხვა დაცვის მხარეს სურს, რომელიც აცხადებს, რომ ანზორ ჩუბინიძის მიერ მოწოდებული ინფორმაცია საქმისათვის მნიშვნელოვანი იქნება, რადგან მათი თქმით, დადასტურდება, რომ ე.წ. საიდუმლო ხარჯები სახელმწიფო დაცვის სპეციალურ სამსახურში „ქართული ოცნების“ მმართველობის დროსაც არსებობდა.
ანზორ ჩუბინიძე წერილში სხდომაზე ჩვენების მიცემისთვის მზაობას გამოთქვამს და აღნიშნავს, რომ 28 დეკემბრამდე სამსახურეობრივი მივლინებით ლატვიაში, რიგაში იმყოფება და მზად არის, მომდევნო სხდომებზე გამოცხადდეს.
