ანრი ოხანაშვილი ხელისუფლების მხრიდან ოპონენტების შესაძლო დევნას, “აბსურდად” მოიხსენიებს

თაიმერი timer.ge
ავტ.: თაიმერი timer.ge ივლისი 26, 2019 12:50

ანრი ოხანაშვილი ხელისუფლების მხრიდან ოპონენტების შესაძლო დევნას, “აბსურდად” მოიხსენიებს

ხელისუფლების მხრიდან პოლიტიკური ოპონენტების დევნას უარყოფენ საპარლამენტო უმრავლესობაში. „ქართული ოცნების“ წევრები ამბობენ, რომ რეპრესიები არ მიმდინარეობს.

პარლამენტის იურიდიულ საკითხთა კომიტეტის თავმჯდომარე, ანრი ოხანაშვილი „გამარჯვებული საქართველოს“ ლიდერის, ირაკლი ოქრუაშვილის დაკავებას ეხმაურება და ამბობს, რომ გამოძიების ობიექტურობაში მას ეჭვი არ შეაქვს.

პარლამენტის იურიდიულ საკითხთა კომიტეტის თავმჯდომარე, კითხვაზე, უკავშირდება თუ არა ირაკლი ოქრუაშვილის დაკავება “რუსთავი 2”-ის საქმეს, ანრი ოხანაშვილი ამბობს, რომ ეს მხოლოდ ოპოზიციის განცხადებებია.

მისივე თქმით, ის უდანაშაულობის პრეზუმფციას იცავს, თუმცა, აქვე აღნიშნავს, რომ შსს-ს მიერ გასაჯაროებულ კადრებში ჩანს, თუ როგორ იქცევა ირაკლი ოქრუაშვილი პოლიციელებთან მიმართებაში.

„პასუხი ამაზე, რომ არის თუ არა ეს თითქოს, რაიმე პოლიტიკურ ინტერესთან დაკავშირებული, ეს არის სრულიად აბსურდი და ამაზე, თუ რატომ არის ეს აბსურდი, პასუხობს ის კადრები, რაც ყველამ ვნახეთ, როგორ მონაწილეობს ეს ადამიანი და რა ქმედებებს ახორციელებს რუსთაველის გამზირზე პოლიციელებთან მიმართებაში. ჩემი ვალდებულებაა, დავიცვა უდანაშაულობის პრეზუმფცია, მე სხვა დამატებით კომენტარს ამ ეტაპზე ვერ გავაკეთებ. ძალიან კარგად იცით, რა კადრებზეც არის საუბარი, შსს-მაც გაასაჯაროვა კიდევ ერთხელ ეს კადრები, თუ როგორ არის ჩართული კონკრეტული პირი პოლიციელების წინააღმდეგ მიმართულ ქმედებაში, რას აკეთებენ,“ – განაცხადა ანრი ოხანაშვილმა.

შეგახსენებთ, რომ ირაკლი ოქრუაშვილი გუშინ დააკავეს. შსს-ის ინფორმაციით, ყოფილი თავდაცვის მინისტრი ჯგუფური ძალადობის ორგანიზების, ხელმძღვანელობის და მასში მონაწილეობის ბრალდებით არის დაკავებული.

ოქრუაშვილის გარდა, 20 ივნისის ღამეს განვითარებულ მოვლენებთან დაკავშირებით გუშინ კიდევ 4 პირი დააკავეს, მათ შორის, არის ლევან ლორთქიფანიძე.

თაიმერი timer.ge
ავტ.: თაიმერი timer.ge ივლისი 26, 2019 12:50

გამოკითხვა

ამჟამად არცერთი გამოკითხვა არ მიმდინარეობს.

Google სტატისტიკა


7,150
ვიზიტორი
დღეში
Powered By Google Analytics