თავდაცვის ყოფილი მინისტრის, ბაჩო ახალაიას მეუღლე ანი ნადარეიშვილი თბილისის საქალაქო სასამართლოს გადაწყვეტილებას ეხმაურება და მას პოლიტიკურად მოტივირებულს უწოდებს. ნადარეიშვილის განცხადებით, ქვეყანაში მართლმსაჯულება არ არსებობს.
მისი თქმით, სასამართლო სისტემა მმართველი პარტიის დაკვეთებს ასრულებს, რათა ბაჩო ახალაია საპატიმროში დიდხანს დარჩეს:
„სასამართლო შენობაში სხედან ნოტარიუსები მოსამართლეების მანტიებით და სამწუხაროდ, საქართველოს სახელით გამოაქვთ გადაწყვეტილებები. ეს არის ჩვეულებრივი პოლიტიკური გადაწყვეტილებები, რომელსაც ნოტარიუსები — ანუ მოსამართლეები ოფიციალურად აფორმებენ. „ქართულ ოცნებას“ სურს ბაჩო ახალაია ციხეში ბევრი ხნით გამოკეტოს“, — აცხადებს ანი ნადარეიშვილი.
ცნობისთვის: თბილისის საქალაქო სასამართლოს მოსამართლე რომეო ტყეშელაშვილმა ბაჩო ახალაია დამნაშავედ ცნო საქართველოს კონსტიტუციური წყობილების ძალადობით შეცვლისა და სახელმწიფო ხელისუფლების დამხობისკენ მოწოდების საქმეზე. მას სასჯელის სახით 2 წლითა და 6 თვით თავისუფლების აღკვეთა მიესაჯა.
