ვპროგნოზირებთ, რომ მიმდინარე კვირის ბოლოს უნდა გვქონდეს კორონავირუსის 350-დან 400-მდე შემთხვევა, – ამის შესახებ დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორმა, ამირან გამყრელიძემ განაცხადა.
მისივე თქმით, აპრილის თვე და მაისის პირველი ორი კვირა იქნება რთული, ამიტომ მოსახლეობამ ყველა რეკომენდაცია უნდა შეასრულოს.
„ახალი ინფექციაა, რომელიც დეკემბრის ბოლოს დაიწყო, ვირუსის ქცევის შესახებ, ბევრი არაფერია ცნობილი, არსებობს ბევრი თეორია და ბევრი მათემატიკური მოდელი ამ დაავადების გავრცელების, მსოფლიო ჯერ ერთ ციფრზე ვერ ჯერდება, რამდენ ხანს გაგრძელდება. მეცნიერთა ერთი უმრავლესობა ემხრობა იმას, რომ უფრო თბილ სეზონზე კორონავირუსმა უკან უნდა დაიხიოს და წავიდეს კლებისკენ შედარებით როგორც ახალი შემთხვევები და სიკვდილიანობა და რომ ის გადაიქცეს სეზონურ ვირუსად, რომელიც სიცივეში შეგვახსენებს ხოლმე თავს და შეიძლება იყოს უფრო რთული და მძიმე, ვიდრე გრიპის ვირუსი. ამიტომ, მუშაობენ მეცნიერები ვაქცინის შექმნისთვის. საქართველოში ვფიქრობთ, რომ აღმავალ ფაზაში ვართ, გვაქვს შემთხვევების მატება. ვპროგნოზირებდით გარკვეულად ჩვენ, რომ კვირის ბოლოს უნდა გვქონოდა 200 შემთხვევა, კვირა დღის ბოლოს გვქონდა უფრო ნაკლები, რამდენიმე ერთეულით შევცდით, ეს კარგია. ასევე ვპროგნოზირებთ, რომ ამ კვირის ბოლოს უნდა გვქონდეს 350-დან 400-მდე. შემდგომი კვირები, მთლიანად აპრილი, იქნება რთული, შემდგომ ველოდებით, რომ ყოველკვირეულად უნდა იყოს გაორმაგება. ამიტომ აპრილი, მაისის პირველი ორი კვირა იქნება საკმაოდ რთული, ამიტომ ყველა ის რეკომენდაცია, რასაც ვამბობთ, გასათვალისწინებელია, განსაკუთრებით სოციალური დისტანცირება“, – განაცხადა გამყრელიძემ.
მისი თქმით, სოციალური დისტანცირება არის ინფექციასთან ბრძოლის ერთ-ერთი ყველაზე მძლავრი იარაღი.
„თუმცა, არის კიდევ სხვა მოდელები, რომლებიც გვიწინასწარმეტყველებენ, რომ პიკი შეიძლება იყოს უფრო მოგვიანებით, ივლისში ან სექტემბერში, ან ასე და ასე შემდეგ, მაგრამა ამაზე გარკვეული პერიოდულობით იკრიბება ჯგუფი ექსპერტებისა, ვმსჯელობთ და ვისაც დააინტერესებს შეუძლია შემოგვიერთდეს“, – განაცხადა ამირან გამყრელიძემ.
