ამერიკის შეერთებული შტატების სახელმწიფო დეპარტამენტი საქართველოში 31 ოქტომბრის საპარლამენტო არჩევნებზე დაკვირვების მიზნით მოხალისეებს გამოგზავნის

თაიმერი timer.ge
ავტ.: თაიმერი timer.ge სექტემბერი 16, 2020 21:32

ამერიკის შეერთებული შტატების სახელმწიფო დეპარტამენტი საქართველოში 31 ოქტომბრის საპარლამენტო არჩევნებზე დაკვირვების მიზნით მოხალისეებს გამოგზავნის

მნიშვნელოვანი

  • ამერიკის შეერთებული შტატების სახელმწიფო დეპარტამენტი საქართველოში 31 ოქტომბრის საპარლამენტო არჩევნებზე დაკვირვების მიზნით მოხალისეებს გამოგზავნის

სხვა სტატიები

ამერიკის შეერთებული შტატების სახელმწიფო დეპარტამენტი საქართველოში 31 ოქტომბრის საპარლამენტო არჩევნებზე დაკვირვების მიზნით მოხალისეებს გამოგზავნის. ისინი ეუთო/ოდირის სადამკვირვებლო ჯგუფს შეუერთდებიან.

წერილში, რომელიც მაიკ პომპეომ დავით ზალკალიანს გამოუგზავნა, ნათქვამია, რომ აშშ მხარს უჭერს ეუთო-ს დემოკრატიული ინსტიტუტებისა და ადამიანის უფლებების ოფისის (ODIHR) რეკომენდაციას სრული სადამკვირვებლო ჯგუფის განთავსების შესახებ, რომელიც მოიცავს ძირითად ჯგუფს, 28 დამკვირვებელს გრძელვადიანი პერიოდით და 350 დამკვირვებელს მოკლევადიანი პერიოდით. ჩვენ, ასევე, ვაცნობიერებთ COVID-თან დკავშირებული ლოჯისტიკურ გამოწვევებს, რამაც, შესაძლოა, გაართულოს სრულმასშტაბიანი მისიის ორგანიზება.

სახელმწიფო მდივანი მიუთითებს, რომ აშშ აცნობიერებს COVID 19-ით გამოწვეულ ლოჯისტიკურ პრობლემებს.

„ძვირფასო მინისტრო, მადლობას გიხდით თქვენი წერილისთვის და 31 ოქტომბრის საპარლამენტო არჩევნებზე დაკვირვების მიზნით საქართველოში მიწვევისთვის. მე ვიზიარებ თქვენს ძალისხმევას, უზრუნველყოთ საერთაშორისო სტანდარტებთან და საუკეთესო პრაქტიკასთან შესაბამისი, თავისუფალი, სამართლიანი და გამჭვირვალე არჩევნები. კონკურენტუნარიანი გარემო, საარჩევნო რეფორმების ზუსტი იმპლემენტაცია, ადამიანის უფლებებისა და გამოხატვის, გაერთიანებისა და შეკრების ფუნდამენტური თავისუფლებების პატივისცემა მნიშვნელოვანია, როგორც არჩევნების დღეს, ასევე არჩევნებამდე და არჩევნების შემდგომ პერიოდში. მე ვაფასებ ყველა ნაბიჯს, რომელიც საქართველოს მთავრობამ გადადგა საერთაშორისო დამკვირვებლების ქვეყანაში ჩამოსვლის წახალისებისა და ხელშეწყობის მიზნით.

ჩვენ მხარს ვუჭერთ ეუთო-ს დემოკრატიული ინსტიტუციებისა და ადამიანის უფლებების ოფისის (ODIHR) რეკომენდაციას სრული სადამკვირვებლო ჯგუფის განთავსების შესახებ, რომელიც მოიცავს ძირითად ჯგუფს, 28 დამკვირვებელს გრძელვადიანი პერიოდით და 350 დამკვირვებელს მოკლევადიანი პერიოდით.

ჩვენ, ასევე, ვაცნობიერებთ „კოვიდთან“ დაკავშირებულ ლოჯისტიკურ გამოწვევებს, რამაც, შესაძლოა, გაართულოს სრულმასშტაბიანი მისიის ორგანიზება. დეპარტამენტი შეარჩევს მოხალისეებს ამერიკის შეერთებული შტატებიდან, რათა ისინი შეუერთდნენ ეუთო-ს ადამიანის უფლებებისა და დემოკრატიული ინსტიტუტების ოფისის (ODIHR) მისიას.

ეუთო-ს ადამიანის უფლებებისა და დემოკრატიული ინსტიტუტების ოფისის ​მისიის გარდა, თბილისში ამერიკის შეერთებული შტატების საელჩო, ცენტრალურ საარჩევნო კომისიასთან კოორდინაციით, უზრუნველყოფს საელჩოს გუნდის მხრიდან დაკვირვებას. მიუხედავად იმისა, რომ „კოვიდ-19“-ის გამო, საერთაშორისო რესპუბლიკურმა ინსტიტუტმა (IRI) და ეროვნულმა დემოკრატიულმა ინსტიტუტმა (NDI) გადაწყვიტეს, არ განათავსონ საერთაშორისო დამკვირვებლები მოკლე პერიოდით არჩევნების დღეს, ჩვენ ვმუშაობთ NDI-სა და IRI-სთან ალტერნატიული გამოსავლის მოძიების მიზნით, რაც მათ საშუალებას მისცემს, დააკვირდნენ არჩევნებს. მათ შორის, გრძელვადიანი პერიოდით ანალიტიკოსებისა და ვირტუალური დამკვირვებლების სახით, რომლებიც ქართველო კოლეგებთან ერთად იმუშავებენ.

ჩვენ ვაფასებთ თქვენს ძალისხმევას აშშ-ისა და საერთაშორისო დამკვირვებლების მხარდაჭერასთან დაკავშირებით და კვლავ მზად ვართ, დავეხმაროთ საქართველოს იმ რეფორმების განხორციელებაში, რომლებიც განამტკიცებენ თქვენს დემოკრატიულ ინსტიტუციებს და გააძლიერებენ დემოკრატიულ პროცესებს“, – წერს მაიკ პომპეო წერილში, რომლის თარგმანს საქართველოს საგარეო საქმეთა სამინისტრო ავრცელებს.

თაიმერი timer.ge
ავტ.: თაიმერი timer.ge სექტემბერი 16, 2020 21:32