იმის სამართლებრივი საფუძველი არ არსებობს, რომ მიხეილ სააკაშვილი სასამართლო პროცესზე არ გადაიყვანონ, – ამის შესახებ საქართველოს ყოფილი პრეზიდენტის, ერთ-ერთმა ადვოკატმა, ბექა ბასილაიამ, გლდანის ციხესთან განაცხადა.
როგორც მან აღნიშნა, გლდანის პენიტენციურ დაწესებულებასთან იმისთვის მივიდა, რომ გაარკვიოს, აპირებენ თუ არა მიხეილ სააკაშვილის გადაყვანას სასამართლოზე.
“თუ სასამართლოზე მის გადაყვანას არ აპირებენ, ასეთ შემთხვევაში, ჩვენ მას აქ შევხვდებით, თუმცა, ჩვენი შეხვედრის გამო არ დავაბრკოლებთ საბადრაგო სამსახურის მიერ მიხეილ სააკაშვილის გადაყვანის პროცესს. თუ გადაჰყავთ, აქ არ შევხვდებით და სასამართლოზე ვნახავთ მიხეილ სააკაშვილს. თუმცა, იმის ილიზია, რომ ხელისუფლება უზრუნველყოფს მიხეილ სააკაშვილის საზოგადოების წინაშე გამოჩენას, არ გვაქვს.
პენიტენციური სამსახურის ე.წ. არგუმენტები ჩვენ უკვე მოვისმინეთ. რატი ბრეგაძეს სასამართლოს წინაშე პირდაპირი დირექტივები ჰქონდა, რომ სასამართლო პროცესი უნდა ჩატარებულიყო მიხეილ სააკაშვილის დასწრების გარეშე”, – განაცხადა ბექა ბასილაიამ.
