“რესპუბლიკური პარტია” ქორწინების საკითხზე კონსტიტუციური ცვლილების ინიცირების პროცესს ემიჯნება

რესპუბლიკური პარტიისა და პრემიერმინისტრის შეხვედრა დღეს 21:00 საათზე გაიმართება

“რესპუბლიკური პარტია” პოლიტსაბჭოს გუშინდელი სხდომის შედეგად მიღებულ გადაწყვეტილებასთან დაკავშირებით განცხადებას ავრცელებს.

განცხადებაში აღნიშნულია, რომ “საქართველოს კონსტიტუციით და კანონმდებლობით ქორწინება მხოლოდ და მხოლოდ ქალსა და მამაკაცს შორის კავშირია და ამ საკითხში ცვლილების შეტანას, არც სამართლებრივად და არც პოლიტიკურად, არავინ და არაფერი გვავალდებულებს”.

“ქორწინების სუბიექტების დაზუსტების თაობაზე, კონსტიტუციური ცვლილების ინიცირების შესახებ ბოლო ხანებში წამოწეული საკითხის დეტალურმა ანალიზმა კიდევ ერთხელ დაგვარწმუნა, რომ: ა) კონსტიტუციურად და სამართლებრივად დასაზუსტებელი არაფერია – სრულიად ცალსახაა, რომ საქართველოში მოქმედი კონსტიტუციით და კანონმდებლობით ქორწინება არის მხოლოდ და მხოლოდ ქალსა და მამაკაცს შორის კავშირი და სხვა არაფერი. ამაზე მეტყველებს კონსტიტუციის მოქმედი ნორმის კონსტრუქცია, ნორმატიული შინაარსი და ტერმინოლოგია („მეუღლეთა“, „ოჯახი“, „დედათა და ბავშვთა“), აგრეთვე, კონსტიტუციის სწორედ ამგვარ განზრახულობას ადასტურებს მისი უკლებლივ ყველა ავტორი”, – აღნიშნულია განცხადებაში.

“რესპუბლიკური პარტიის” განცხადებით, ამ საკითხზე კონსტიტუციაში რაიმეს კიდევ უფრო დაზუსტება, თუნდაც, მხოლოდ პოლიტიკურ-პიარული მიზნით, მოქმედ პარლამენტში ფიზიკურად შეუძლებელია, ვინაიდან პროექტის ინიცირებისთვის საკმარისია 76 ხმა, მაგრამ მის მისაღებად აუცილებელია 113 ხმა.

“აღნიშნული კონსტიტუციური ცვლილების ინიცირებით და მისი ვერ მიღებით ჩვენ არა თუ ვერ გავამყარებთ, არამედ დავაზიანებთ ქორწინებას, როგორც ქალისა და მამაკაცის კავშირს. თუ ინიცირებული კონსტიტუციური ცვლილებების პროექტით ინიციატორები აცხადებენ, რომ კონსტიტუციაში სიტყვა “მეუღლეთა” უნდა შეიცვალოს სიტყვებით “ქალისა და მამაკაცის”, მაშინ ინიციატორები ამბობენ იმასაც, რომ დღეს, სანამ რამე არ შეცვლილა, კონსტიტუცია ქორწინების უფლებას შეიძლება აძლევდეს ვინმე სხვასაც, გარდა ქალისა და მამაკაცისა”, – აღნიშნულია განცხადებაში.

“რესპუბლიკური პარტია” თვლის, რომ ინიცირება საფრეთხეების წინაშე აყენებს საზოგადოებას და არ აპირებს, ასე წინდაუხედავად შეაბიჯოს შორისმიმავალი მიზნებით დაგებულ პოლიტიკურ მახეში.

“თუ რას ემსახურება ამ საკითხის წამოწევა, ვინ გულწრფელი მოტივებით ადგება არასწორ გზას და ვინ ცდილობს ამ მეტად მგრძნობიარე თემაზე სპეკულირებით პოლიტიკური დივიდენდების მიღებას, ამის გარკვევა საქართველოს მოქალაქეებისთვის მიგვინდვია. შესაბამისად, მას შემდეგ, რაც პრაქტიკულად ამოიწურა შიდაკოალიციური კონსულტაციების რესურსი, “რესპუბლიკური პარტია” ადასტურებს პატივისცემას თითოეული დეპუტატის, მათ შორის, ჩვენივე ფრაქციის წევრების, განსხვავებული პოზიციისადმი, მაგრამ პოლიტიკურად ემიჯნება კონსტიტუციური ცვლილების ინიცირების პროცესს, რომელსაც მოჰყვება არა საკითხის უკეთ გადაწყვეტა, არამედ საკითხის უფრო გამწვავება თანამდევი პოლიტიკური მეტასტაზებით”, – აღნიშნულია განცხადებაში.

შეგახსენებთ, გუშინდელ პოლიტსაბჭოზე პრემიერ-მინისტრის გიორგი კვირიკაშვილის განცხადებით, კოალიციამ მიიღო გადაწყვეტილება, რომ საკონსტიტუციო ცვლილების ინიცირება უნდა დაიწყოს, რომელიც ქორწინებას ეხება. კვირიკაშვილის განცხადებით, აუცილებელია, კონსტიტუციაში აღნინიშნოს, რომ ქორწინება არის ქალის და მამაკაცის ერთობა.

banner
წინა სტატიაშიკახა კალაძე: გვახსოვდეს, რომ მხოლოდ ბედნიერი ქალის გვერდით გრძნობს მამაკაცი თავს სრულყოფილად
შემდეგი სტატიალევან მექვაბიშვილს წინასწარი პატიმრობა შეეფარდა