ფრაქცია “რესპუბლიკელების” წევრი ლევან ბერძენიშვილი დარწმუნებულია, რომ ყველა მაჟორიტარულ ოლქში არჩევნებს სახელისუფლო კანდიდატი მოიგებს.
“ყველა მაჟორიტარულ ოლქს “ქართული ოცნება” მოიგებს – 73-ვეს მოიგებს. 50%-იანი ბარიერის გათვალისწინებით სხვა პარტიები მეორე ტურს ყველგან წააგებენ. 50%-ს ვერ აგროვებენ. ჩვენ ხმების 50%-ს მეორე ტურში კი არა, ზოგიერთ ოლქებში პირველივე ტურში დავაგროვებთ. ამ სისტემაში საკუთარი ამომრჩევლების მხრიდან როგორი მხარდაჭერაც არ უნდა ჰქონდეს “ნაციონალურ მოძრაობას”, ის ვერც ერთ მაჟორიტარულ ოლქს ვერ მოიგებს. ვარკვლავებს არც სხვა ოპოზიციური პარტიები წყვეტენ”, – განუცხადა “ინტერპრესნიუსს” ლევან ბერძენიშვილმა.
ამასთან, ბერძენიშვილი ფიქრობს, რომ “თავისი შანსები აქვთ “თავისუფალ დემოკრატებს” და ისინი მეორე ადგილისთვის იბრძოლებენ”.
