რუსეთმა შავ ზღვაში გერმანიის მფლობელობაში მყოფ სატვირთო გემს დრონებით დაარტყა – ინფორმაციას გერმანული გამოცემა Bild ავრცელებს.
თავდასხმა ლიბერიული დროშის ქვეშ მცურავ გემ EMIL-ზე დაემთხვა შავ ზღვაში კომერციულ საზღვაო ვაჭრობაზე რუსული დარტყმების ინტენსივობის გაზრდას. უკრაინული ხელისუფლების ცნობით, ცალკეული თავდასხმა განხორციელდა გვინეა-ბისაუს დროშის ქვეშ მცურავ ხორბლის გადამზიდავ ბალკერ Mera Queen-სზეც, რის შედეგადაც ეკიპაჟის ერთი წევრი დაიღუპა.
ჰამბურგში დაფუძნებულ საზღვაო გადაზიდვების კომპანია Johann M. K. Blumenthal GmbH & Co. KG-ს მფლობელობაში არსებული EMIL თავდასხმის მომენტში უკრაინული სანაპირო ქალაქიდან, ოდესიდან, დაახლოებით 21 საზღვაო მილის მოშორებით იმყოფებოდა. დარტყმებმა გემზე ხანძარი გამოიწვია და მწყობრიდან გამოიყვანა ძირითადი ტექნიკური სისტემები. როგორც Bild წერს, მეორადი თავდასხმა 11-წევრიანი ეკიპაჟის ევაკუაციის დროს მოხდა, დაშავებულთა შესახებ ინფორმაცია არ გავრცელებულა.
Bild-ის ცნობით, რუსეთის თავდაცვის სამინისტრომ მოგვიანებით აღიარა შავ ზღვაში ორი სატვირთო გემისთვის დარტყმა და უსაფუძვლოდ განაცხადა, თითქოს გემები უკრაინული ძალებისთვის სამხედრო ტექნიკას ატარებდნენ.
