საქართველოში გერმანიის ელჩი, პიტერ ფიშერი 40-წლიან დიპლომატიურ მოღვაწეობას ასრულებს. 66 წლის დიპლომატის განმარტებით, გერმანული კანონმდებლობის შესაბამისად, ის აქტიურ სამსახურს ტოვებს და მშობლიურ ქალაქს უბრუნდება.
Fიშერმა „ბათუმელებთან“ ინტერვიუში სამომავლო გეგმებზე ისაუბრა და აღნიშნა, რომ ამ სიახლეს მოუთმენლად ელის:
„40 წელზე მეტია დიპლომატი ვარ, ძალიან ვისიამოვნე ამ პროფესიით, მაგრამ 40 წელი საკმარისია, რატომ უნდა გავაგრძელო სამუდამოდ? ვბრუნდები ბერლინში, ჩემს მშობლიურ ქალაქში. იქ 5 წლიდან ვცხოვრობდი, იქ დავამთავრე სკოლა და უნივერსიტეტი. გვაქვს ძალიან ლამაზი „ბელ ეპოკის“ პერიოდის ბინა, რომელიც კულტურული მემკვიდრეობის ძეგლია, არაჩვეულებრივ უბანში. ვბრუნდები ევროკავშირში, რომელიც ძალიან მიყვარს“, — ამბობს ელჩი.
დიპლომატის თქმით, საქართველო მისი მეშვიდე მისია იყო საზღვარგარეთ და ყველა ქვეყანაში, სადაც კი უმუშავია, ხალხთან კონტაქტები დღემდე შეინარჩუნა.
