შსს-მ 35 წლის ქალის საქმეზე დედის მიერ მშობიარობისას ან უმალვე, მშობიარობის შემდეგ ახალშობილის განზრახ მკვლელობის მუხლით გამოძიება დაიწყო.
როგორც სამედიცინო დაწესებულებებში აცხადებენ, შეწყვეტილი ორსულობის გამო, 35 წლის ქალის ჯანმრთელობის მდგომარეობა დამძიმდა, რის შემდეგაც, ის სამედიცინო დაწესებულებაში სასწრაფო დახმარების ჯგუფმა გადაიყვანა.
კლინიკა „ღია გულის“ კრიტიკული მედიცინისა და ინტენსიური თერაპიის დეპარტამენტის უფროსი ხათუნა ჯაფარიძე აცხადებს, რომ მათთან შეიყვანეს პაციენტი, რომელსაც ოპერაცია ჩაუტარდა.
„ქალი ამბობს, რომ იყო ორსულად და მოხდა ორსულობის შეწყვეტა. ამის შემდეგ განვითარდა სისხლდენა. მან კლინიკას თავის დროზე არ მიმართა. ორსულობის შეწყვეტა 26 აგვისტოს მოხდა. კლინიკაში სასწრაფომ გუშინ მოიყვანა. ამჟამად არის რეანიმაციულ განყოფილებაში. პოსტოპერაციულ პერიოდი მიმდინარეობს სტაბილურად, პაციენტის მდგომარეობა მძიმეა, თუმცა გაუარესება არ აღენიშნება. პაციენტი ვერ ამბობს, ზუსტად რომელ ხანას შეესაბამებოდა ორსულობა, როცა ის შეწყდა“, – განაცხადა ექიმმა.
სოციალური მუშაკი ანა სეხნიაშვილი აღნიშნავს, რომ ქალს მცირეწლოვანი შვილი ჰყავს. მისი ერთი წლის გოგონა სოცმუშაკებმა სანდო პირთან გადაიყვანეს.
„ოჯახის სანდო პირი იქნა მოძიებული. დედის თქმით, ამ სანდო პირის მიმართ ბავშვს ემოციური მიჯაჭვულობა აქვს და იქნება უსაფრთხოდ. ბავშვის დედას ოჯახი ჰყავს, მასთან ვაწარმოებთ მოლაპარაკებას, რომ საჭიროების შემთხვევაში, მზრუნველობა და მეურვეობა აიღოს დედის ოჯახმა მცირეწლოვანზე. სანდო პირის ოჯახში ბავშვი იქამდე დარჩება, სანამ დედას არ გამოწერენ საავადმყოფოდან“, – აღნიშნა სოცმუშაკმა.
ამასთან, შსს-ში აცხადებენ, რომ ქალს გამომძიებლები ჯერ არ გასაუბრებიან.
