უნგრეთის ოპოზიციურმა პარტია „ტისამ” საარჩევნო პროგრამა გამოაქვეყნა, რომელიც მდიდარი თანამოქალაქეებისთვის გადასახადის შემოღებას და ევროს ვალუტაზე სრულად გადასვლას ითვალისწინებს.
240-გვერდიან საარჩევნო პროგრამაში ნათქვამია, რომ არჩევნებში გამარჯვების შემთხვევაში პარტია უნგრეთის ევროკავშირსა და ნატო-ში მყარად დამკვიდრებას გეგმავს.
პარტიის ლიდერმა, პიტერ მაგიარმა განაცხადა, რომ შეამცირებს კორუფციას და ეკონომიკის გასაძლიერებლად ევროკავშირის ფონდებში გაყინულ მილიარდობით ევროს გაათავისუფლებს.
„მათთვის, ვისი შემოსავალიც 1 მილიარდ ფორინტს აღემატება, ჩვენ შემოვიღებთ ყოველწლიურ 1%-იან გადასახადს”, – აღნიშნულია განცხადებაში.
ამასთან, პროგრამაში აღნიშნულია, რომ 2035 წლისთვის უნგრეთის დამოკიდებულებას რუსულ ენერგიაზე დაასრულებენ და 2040 წლისთვის განახლებადი ენერგიის წყაროების წილს გააორმაგებენ.
„ჩვენ დაუყოვნებლივ დავიწყებთ ჯანდაცვის, განათლების, სოციალური დაცვის სისტემის, ბავშვთა დაცვის სისტემის და საზოგადოებრივი ტრანსპორტის რეფორმირებას. ჩვენ გადავდგამთ ნაბიჯებს ეკონომიკის აღსადგენად და დავასრულებთ სტაგნაციის წლებს. სასამართლო სისტემას ექნება ერთადერთი მიზანი: შეასრულოს თავისი კანონიერი მოვალეობა. ჩვენ აღვადგენთ უნგრეთის საერთაშორისო სტატუსს. ჩვენ შევქმნით პატივისცემაზე დაფუძნებულ პარტნიორობას და გავაძლიერებთ უნგრეთის სუვერენიტეტს. ახალი მთავრობის საგარეო პოლიტიკა არ იქნება დიდი ძალების წინაშე დამორჩილება, არამედ ფრთხილად შემუშავებული, მტკიცედ წარმოდგენილი ეროვნული ინტერესები“, – განაცხადა მაგიარმა.
ცნობისთვის, უნგრეთში საპარლამენტო არჩევნები 12 აპრილს გაიმართება. Zavecz Research-ის მიერ ჩატარებული გამოკითხვის მიხედვით, უნგრეთის ოპოზიციური პარტია „ტისა“ ვიქტორ ორბანის პარტია „ფიდესთან“ შედარებით ათი პროცენტით ლიდერობს.
