უკრაინის შეიარაღებული ძალების გენერალური შტაბის ინფორმაციით, 2026 წლის ივლისში რუსეთის არმიამ 42 860 სამხედრო მოსამსახურე დაკარგა დაღუპულებისა და დაჭრილების სახით. უწყების შეფასებით ეს სრულმასშტაბიანი ომის დაწყების შემდეგ ერთ თვეში დაფიქსირებული ყველაზე მაღალი მაჩვენებელია. ომის შემსწავლელი ინსტიტუტის (ISW) ანალიტიკოსების განცხადებით, ეს მიუთითებს რუსული დანაკარგების სტაბილურ ზრდაზე, რომელიც 2026 წლის თებერვლიდან შეინიშნება. მაშინ დანაკარგები 26 090 სამხედრო მოსამსახურედ იყო შეფასებული.
მიუხედავად რეკორდული დანაკარგებისა, ISW-ის შეფასებით, რუსეთის შეტევის ტემპი კვლავ ძალიან დაბალია. ინსტიტუტის მონაცემებით, ივლისში რუსულმა ძალებმა უკრაინის ტერიტორიაზე მხოლოდ 37,85 კვადრატული კილომეტრით შეძლეს წინსვლა, რაც მანჰეტენის ფართობზე ნაკლებია. საშუალოდ, ეს დღეში 1,22 კვადრატული კილომეტრის წინსვლას შეადგენს.
თუ გავითვალისწინებთ იმ მონაკვეთებსაც, სადაც რუსულმა ქვედანაყოფებმა მხოლოდ უკრაინული თავდაცვის ხაზში შეღწევა შეძლეს, მათ მიერ დაკავებული ან საცეცხლე კონტროლის ქვეშ მოქცეული ტერიტორია დაახლოებით 121,56 კვადრატულ კილომეტრს აღწევს. შედარებისთვის, 2025 წლის ივლისში რუსეთის არმიამ 455,74 კვადრატული კილომეტრი დაიკავა. ISW აღნიშნავს, რომ ლოკალური გარღვევების ტაქტიკის მიუხედავად, შეტევის ამჟამინდელი ტემპი მხოლოდ მცირედით აღემატება 2026 წლის თებერვლის მაჩვენებლებს, რომლებიც გაზაფხული-ზაფხულის შეტევას წინ უძღოდა.
ინსტიტუტის შეფასებით, რუსეთისთვის დანაკარგებსა და მიღწეულ შედეგებს შორის თანაფარდობა სულ უფრო არახელსაყრელი ხდება. უკრაინის გენშტაბის მონაცემებით, ივლისში რუსეთის არმია საშუალოდ 353 სამხედროს კარგავდა ყოველ იმ კვადრატულ კილომეტრზე, სადაც წინსვლა ან უკრაინულ თავდაცვაში შეღწევა შეძლო, ხოლო თითოეულ სრულად დაკავებულ კვადრატულ კილომეტრზე დანაკარგი 1 132 სამხედრო მოსამსახურეს შეადგენდა.
ამ ფონზე, ISW-ის შეფასებით, კრემლი აძლიერებს საინფორმაციო კამპანიას, რათა შექმნას შთაბეჭდილება, თითქოს შეტევა რეალობაზე უფრო წარმატებულია.
კერძოდ, 31 ივლისს რუსეთის თავდაცვის სამინისტრომ და სააგენტო TASS-მა გაავრცელეს, ინსტიტუტის შეფასებით, გადაჭარბებული მონაცემები ივლისში თითქოს დაკავებული დასახლებული პუნქტების რაოდენობის შესახებ. თუმცა, ISW-ის თქმით, ეს განცხადებებიც კი არ მიუთითებს ისეთ წინსვლის ტემპზე, რომელიც უკრაინის თავდაცვის გარღვევისა და იმ ტერიტორიების ოკუპაციისთვის იქნებოდა საკმარისი, რომელთა დაკავებასაც მოსკოვი 2026 წლის ბოლომდე გეგმავდა.
მსგავსი შეფასება მანამდე სტრატეგიული და საერთაშორისო კვლევების ცენტრმაც (CSIS) გამოაქვეყნა. 1 ივლისს გამოქვეყნებული კვლევის მიხედვით, სრულმასშტაბიანი ომის დაწყებიდან 2026 წლის ივნისამდე რუსეთის არმიის საერთო დანაკარგები დაახლოებით 1,4 მილიონ სამხედრო მოსამსახურეს შეადგენს.
