ქობულეთი – ბათუმის შემოვლით ცენტრალურ საავტომობილო გზაზე, ავტოსაგზაო შემთხვევის შედეგად ორი ადამიანი დაიღუპა, ერთი კი მძიმედ დაშავდა. დაშავებული სასწრაფო სამედიცინო დახმარების ჯგუფმა კლინიკაში გადაიყვანა.
არსებული ცნობებით, ავტოსაგზაო შემთხვევა გამთენიისა მოხდა, ერთმანეთს სატვირთო მანქანა და ავტობუსი შეეჯახა. “თაიმერის” ინფორმაციით, სატვირთო ავტომობილი სენაკის სამხედრო ბაზას ეკუთვნის.
შემთხვევის ადგილზე მობილიზებული იყვნენ საპატრულო პოლიციის ეკიპაჟები და სასწრაფო სამედიცინო დახმარების ბრიგადები, რომლებმაც დაშავებული ადგილობრივ კლინიკაში გადაიყვანეს.
შს სამინისტროში ფაქტს ადასტურებენ. უწყების ინფორმაციით, ფაქტზე გამოძიება საქართველოს სისხლის სამართლის კოდექსის 276-ე მუხლის მე-6 ნაწილით მიმდინარეობს.
აღნიშნულთან დაკავშირებით საქართველოს თავდაცვის სამინისტრომ განცხადება გაავრცელა, რომელსაც უცვლელად გთავაზობთ:
“დღეს, ქობულეთის შემოვლით გზაზე მომხდარ ავტოსაგზაო შემთხვევას ემსხვერპლა თავდაცვის ძალების ორი სამხედრო მოსამსახურე, მძღოლი კაპრალ სპეციალისტი ლევან აშორტია და კაპრალი ლავრენტი მაკარაძე.
თავდაცვის სამინისტრო ღრმა მწუხარებას გამოთქვამს მომხდარის გამო და თანაუგრძნობს გარდაცვლილი სამხედროების ოჯახის წევრებსა და ახლობლებს” – წერს თავდაცვის სამინისტრო გავრცელებულ განცხადებაში.
