საქართვლოს ეროვნული გმირი დღეს 40 წლის გახდებოდა-18 აგვისტო გიორგი ანწუხელიძის დაბადების დღეა. ანწუხელიძე 2008 წლის ომში რუსებს ტყვედ ჩაუვარდა და სასტიკი წამების შემდეგ ცემით მოკლეს. მას ქვეყნის ეროვნული გმირის წოდება 2013 წლის 15 აპრილს მიენიჭა, სიკვდილის შემდეგ ასევე დაჯილდოებულია ვახტანგ გორგასლის I ხარისხის ორდენით და “სამშობლოსათვის თავდადებულის” მედლით! ქართველი გმირის სახელს ატარებს საქართვლოს სერჟანტთა აკადემიაც.
აგვისტოს ომის გმირი, გიორგი ანწუხელიძე, რუსმა სამხედროებმა ზუსტად 16 წლის წინ, ცხინვალში, მე-5 სკოლასთან, ძმათა სასაფლაოზე, წამებითა და ცემით მოკლეს.
უმცროსი სერჟანტი რუსეთს ტყვედ სწორედ 2008 წლის 9 აგვისტოს ჩაუვარდა. 2008 წლის ნოემბრამდე ანწუხელიძე უგზო-უკვლოდ დაკარგულად ითვლებოდა.
თუმცა, მოგვიანებით ოკუპირებული ცხინვალიდან გადმოსვენებული 10 ქართველის ცხედრის გენეტიკური ექსპერტიზის შედეგად დადგინდა, რომ ანწუხელიძე ერთ-ერთი მათგანი იყო.
2009 წლის იანვარში ინტერნეტში გავრცელდა ვიდეო მასალა, რომელშიც გიორგი ანწუხელიძე ოკუპანტებს წრეში ჰყავთ მოქცეული და მას რიგრიგობით ურტყამენ ფეხებს კეფასა თუ ზურგზე.
ოკუპანტები ანწუხელიძეს აიძულებდნენ, მიწისთვის ეკოცნა, თუმცა 23 წლის გმირის გატეხა ვერ შეძლეს. საბოლოოდ, ის ოსმა სეპარატისტებმა ცემით მოკლეს და ოკუპირებულ ცხინვალში დატოვეს.
2009 წელს გიორგი ანწუხელიძეს მიენიჭა ვახტანგ გორგასლის I ხარისხის ორდენი. 2011 წელს საქართველოს თავდაცვის სამინისტრომ ის „სამშობლოსთვის თავდადებულის“ მედლით დააჯილდოვა. 2013 წლის 15 აპრილს საქართველოს იმჟამინდელი პრეზიდენტის მიხეილ სააკაშვილის გადაწყვეტილებით ეროვნული გმირის სტატუსი მიენიჭა. 2013 წლის 2 ნოემბერს „თუშების სადროშომ“ გიორგი ანწუხელიძეს თუში სახალხო გმირის წოდება მიანიჭა.
მის მშობლიურ სოფელ ალვანში, გიორგი ანწუხელიძის პატივსაცემად, ყოველწლიურად იმართება დალაობა და დოღი.
მისი სახელი მინიჭებული აქვს კავკასიონის ქედის ერთ-ერთ მწვერვალს. გიორგის დარჩა ორი შვილი – ლევანი და ანა.
