გარემოს ეროვნული სააგენტოს მონიტორინგისა და პროგნოზირების ცენტრის ინფორმაციით, 13 ნოემბრამდე საქართველოში არამდგრადი, წვიმიანი ამინდია მოსალოდნელი. მათივე ცნობით, აღმოსავლეთ საქართველოს ზოგიერთ რაიონში მცირე წვიმა და ნისლი ხვალაც შენარჩუნდება, ტემპერატურა კი 10-15 გრადუსი იქნება. თბილისში ხვალ 13-14 გრადუსი იქნება.
დასავლეთ საქართველოში დღეს უმეტესად უნალექო ამინდია მოსალოდნელი. ხვალ შავი ზღვის სანაპირო რაიონებში კი იქნება მცირე წვიმა. ჰაერის ტემპერატურა დაბლობში დღისით 14-19 გრადუსი იქნება.
9 ნოემბრიდან 13 ნოემბრამდე ამინდი მთელ საქართველოში გაუარესდება. დასავლეთ საქართველოს უმეტეს რაიონში იწვიმებს. წვიმის ნალექი გავრცელდება აღმოსავლეთ საქართველოს რაიონებშიც, მაღალმთაში კი იქნება თოვლი.
დასავლეთ საქართველოს დაბლობში 9 ნოემბერს ჰაერის ტემპერატურა დღისით 10-15 გრადუსი იქნება, შემდეგ დღეებში კი კიდევ დაიკლებს.
აღმოსავლეთ საქართველოს ბარში 9 ნოემბერს დღისით ტემპერატურა წინა დღეებთან შედარებით მოიმატებს და 12-17 გრადუსი იქნება.