ახმეტის პოლიციის უფროსი ზურაბ უძილაური თანამდებობიდან გათავისუფლდა. აღნიშნული ინფორმაცია შინაგან საქმეთა სამინისტროში ადასტურებენ.
შეგახსენებთ, რომ გავრცელებული ინფორმაციის თანახმად, ახმეტის პოლიციის ყოფილი უფროსი ზურაბ უძილაური ნარკოტიკული ნივთიერების მოხმარებისთვის და ხულიგნობის ბრალდებით არის ნასამართლევი.
ზურაბ უძილაურთან დაკავშირებით გუშინ საქართველოს შინაგან საქმეთა მინისტრმა ვახტანგ გომელაურმა განცხადება გააკეთა. როგორც გომელაურმა აღნიშნა, ახმეტის პოლიციის უფროს ზურაბ უძილაურთან დაკავშირებით პროკურატურაში მოკვლევა მიმდინარეობს.
“პროკურატურაში მიმდინარეობს მოკვლევა, თუ ეს დამტკიცდება, შესაბამისად, ეს ადამიანი დაისჯება . რაც შეეხება ნარკოტიკული ნივთიერების გამოყენებას, მე არ ვარ საქმის კურსში. რა თქმა უნდა, მოვიკვლევთ. თუ ეს ნამდვილად დადასტურდება, თანამდებობას დატოვებს აუცილებლად”, – განაცხადა ვახტანგ გომელაურმა ჟურნალისტებთან საუბრისას.