საქართველოს პრემიერ-მინისტრი მამუკა ბახტაძე დღეს საპარლამენტო უმრავლესობის წარმომადგენლებს შეხვდება. როგორც ფრაქცია „ქართული ოცნების“ თავმჯდომარე მამუკა მდინარაძემ ჟურნალისტებს განუცხადა, ეს იქნება დასკნითი შეხვედრა, რომლის შემდეგაც საქართველოს მთავრობაში სტრუქტურულ ცვლილებებზე კონსულტაციები დასრულდება. მამუკა მდინარაძის თქმით, შეხვედრა 19:00 საათზეა დაგეგმილი.
„მთლიან უმრავლესობასთან იქნება შეხვედრა, რის შემდეგაც, პრემიერი მიიღებს გადაწყვეტილებას და მას შემდეგ, რაც სამინისტროების სტრუქტურულ ცვლილებებზე მიიღება გადაწყვეტილება, იქნება კონკრეტულ მინისტრობის კანდიდატებზე საუბარი“, – განაცხადა მამუკა მდინარაძემ.
მდინარაძის თქმით, სავარაუდოდ, სამინისტროების რაოდენობა 11-მდე შემცირდება, რის შესახებაც სწორედ დღევანდელი შეხვედრის შემდეგ ისაუბრებენ.
„ქართული ოცნების“ ოფისში რამდენიმე დღეა, მთავრობაში სტრუქტურულ ცვლილებებზე კონსულტაციები მიმდინარეობს. არსებული ინფორმაციით, რამდენიმე სამინისტრო გაერთიანდება.
მცირე მთავრობის კონცეფციის თანახმად, რომელიც პრემიერ-მინისტრ მამუკა ბახტაძის განცხადებით, დაახლოებით სამ კვირაში მომზადდება, სტრუქტურული ცვლილებები განხორციელდება და სამინისტროების რაოდენობა 14-დან 11-მდე შემცირდება.