სამშენებლო და სარემონტო მასალების ჰიპერმარკეტ „გორგიაში“ წერეთლის ქუჩაზე ხანძარი გაჩნდა. საგანგებო სიტუაციათა სამსახურის ცნობით, ცეცხლი 50 კვადრატულ მეტრ ფართობზე იყო და ამ დროისთვის ლიკვიდირებულია.
ადგილზე 5 სახანძრო და ერთი სამაშველო ჯგუფი მუშაობდა.
არსებული ინფორმაციით სასწრაფო დახმარების სამსახურმა ხანძრის შედეგად დაშავებული 8 ადამიანი სხვადასხვა საავადმყოფოში გადაიყვანა. მათ აღენიშნებათ ინტოქსიკაცია და დამწვრობა.