ხელისუფლება სრულ პანიკაშია და ცდილობს, რეპრესიებით შეაჩეროს მოქალაქეთა პროტესტის ტალღა, – ამის შესახებ მიხეილ სააკაშვილის საპრეზიდენტო ბიბლიოთეკის გამგეობის თავმჯდომარემ ანდრო ბარნოვმა დღეს გამართულ პრესკონფერენციაზე განაცხადა.
როგორც ბარნოვმა აღნიშნა, გუშინ და დღეს ხელისუფლებამ პირდაპირი ნადირობა გამოაცხადა “თავისუფალი ზონის” წევრებზე. დღეს კი მათ უკანონო დაკავებაში ღარიბაშვილის დაცვა უშუალოდ მონაწილეობდა.
“გადავიდნენ ტოტალურ დევნაზე, იჭერენ ჟურნალისტებს. დღეს დააკავეს “ტაბულას” ჟურნალისტი ლექსო მაჭავარიანი. ყველას, ვისაც განსხვავებული აზრი აქვს, ეს ხელისუფლება მტრად განიხილავს. ამის მიზეზი ისაა, რომ ხელისუფლება ხედავს, რომ მისმა კოლაბორაციონისტულმა პოლიტიკამ სრული კრახი განიცადა. რუსეთთან ურთიერთობა არათუ არ დალაგდა, არამედ მცოცავი ოკუპაციის სახით დღითიდღე ძალას იკრებს. ამავე დროს ნათელია, რომ ხელისუფლების კოლაბორაციონიზმი სულ უფრო მეტი მოქალაქის პროტესტს იწვევს”, – განაცხადა ბარნოვმა.
მისივე თქმით, ხელისუფლება პანიკაშია და ცდილობს, რეპრესიებით შეაჩეროს მოქალაქეთა პროტესტის ტალღა.
“ღარიბაშვილმა დღეს პირდაპირ მოუწოდა პოლიციას, რომ დასაჯონ ყველა, ვინც ამ კაპიტულანტური რეჟიმის წინააღმდეგ ხმას ამოიღებს. ამასთან, ეს ხელისუფლება ცდილობს, ანტისახელმწიფოებრივად მოაზროვნედ გამოაცხადოს “ნაციონალური მოძრაობა”, რომელმაც სინამდვილეში შექმნა ჩვენი ქვეყნის სახელმწიფოებრიობა. შემზარავია, რომ პატრიოტულად განწყობილი მოქალაქეების პროვოკატორებად გამოცხადება და მათი დევნა სრულად ემთხვევა იმ ცინიკურ მოთხოვნას, რაც ორი დღის წინ კარასინისგან მოვისმინეთ. ჩვენ არ დავუშვებთ პროვინციულ დიქტატურას საქართველოში. ისევ დავდგებით განვითარების გზაზე და ამისათვის მთელი საზოგადოების ერთიანობას მივაღწევთ. მტკიცედ გვწამს, რომ ამ პროცესს ვერავინ შეაჩერებს. ჩვენს ხალხთან ერთად აუცილებლად გავიმარჯვებთ”, – განაცხადა ბარნოვმა.
პრემიერ-მინისტრი ირაკლი ღარიბაშვილი მიიჩნევს, რომ ქვეყნის შიგნით მოქმედი დესტრუქციული ძალები ევროპის ახალგაზრდული ოლიმპიური ფესტივალის დაწყების წინ, ცდილობენ სიტუაცია განსაკუთრებით დაძაბონ, – ამის შესახებ ღარიბაშვილმა ჟურნალისტებს განუცხადა.
“ასეთი პროვოკაციებით ეს ადამიანები ვერაფერს მიაღწევენ. ისეთი ავანტიურისტები, როგორიცაა – “თავისუფალი ზონა”, ანდრო ბარნოვი და სხვები, არიან ანტისახელმწიფოებრივად მოაზროვნეები და ძაბავენ მოსახლეობას. ჩვენთვის მთავარი არის ის, რომ მთავრობა აგრძელებს კონსტრუქციულ პოლიტიკას და ამას ხელს ვერავინ შეუშლის. შიდა დესტრუქციული ძალები ვერ შეგვაჩერებენ, რომლებიც განსაკუთრებით ოლიმპიური თამაშების დაწყებამდე, ძაბავენ სიტუაციას,”- განაცხადა ღარიბაშვილმა.
პრემიერ-მინისტრის თქმით, ეს არის აშკარა, მიზანმიმართული ანტისახელმწიფოებრივი ქმედება, რომელიც დასჯადია.
