44 მშვიდობიანი მოქალაქე დაიღუპა გასული 24 საათის განმავლობაში რუსული ავიაციისა და სირიის სამთავრობო არმიის მიერ იდლიბის პროვინციის ქალაქების დაბომბვის შედეგად. დაღუპულთა შორის 5 მცირეწლოვანია.ამის შესახებ ინფორმაციას, „სირიის ადამიანის უფლებათა ქსელის“ წარმომადგენლებზე დაყრდნობით, ტელეკომპანია „ალ ჯაზირა“ ავრცელებს.
გავრცელებული ინფორმაციით, იერიშების ერთ-ერთი სამიზნე ქალაქი ქილი გახდა, სადაც სულ მცირე 5 ადამიანი დაიღუპა, მათ შორის 3 ბავშვია.
„სირიის სამოქალაქო თავდაცვის ჯგუფი“ და მოხალისეები ხალხის გადარჩენას ცდილობენ. „ადამიანის უფლებათა ცენტრის“ წარმომადგენლის განცხადებით, გასულ კვირას, ქალაქ სარმინის დაბომბვის შედეგად, 12 ადამიანი და ერთი სამოქალაქო თავდაცვის მოხალისე დაიღუპა, რომელიც დაშავებულების გადარჩენას ცდილობდა.
ინტენსიური შეტაკებები მიმდინარეობს ჰამასა და იდლიბის პროვინციებში, ასევე ერაყის სამთავრობო არმიასა და ისლამისტებს შორის. გასული ორი დღის განმავლობაში ამ შეტაკებებს 90 მებრძოლი ემსხვერპლა, მათ შორის 21 სამთავრობო არმიის, 28 „ისლამური სახელმწიფოსა“ და 16 ოპოზიციური მეამბოხე ძალების წარმომადგენელია.
