საქართველოს პრეზიდენტი, გიორგი მარგველაშვილი, კონსულტაციის ფარგლებში, დღეს მედიის წარმომადგენლებს შეხვდა. როგორც შეხვედრის დასრულების შემდეგ , მედიის წარმომადგენლებმა განაცხადეს, პრეზიდენტთან საუბარი იყო იმასთან დაკავშირებით, რომ ქვეყანაში არსებობს სამოქალაქო დაპირისპირების საფრთხე და მსჯელობა გაიმართა, თუ როგორ უნდა მოხდეს ამის თავიდან აცილება.
როგორც ტელეკომპანია “კავკასიის” გენერალურმა დირექტორმა ნინო ჯანგირაშვილმა აღნიშნა, ის პრეზიდენტის განცხადებამდეც საუბრობდა იმას, რომ ქვეყანაში ესკალაციის საფრთხეს ხედავს.
“ვფიქრობ, რომ ასე მარტივად არ ჩაივლის “რუსთავი 2″-ის ისტორია და ყველამ ყველაფერი უნდა გავეკთოთ იმისთვის, რომ ვითარება ბარიკადებზე არ გადავიდეს. ვფიქრობ, რომ პრეზიდენტის მოტივაციაც ეს იყო. ყველამ თავისებურად გაიგო და შეაფასა, მაგრამ მე ასე გავიგე და ჩემი სურვილიც ესაა, რომ ყველამ ყველაფერი უნდა გავეკთოთ, რომ სიტუაცია არ დაიძაბოს უკიდურესად”, – განაცხადა ნინო ჯანგირაშვილმა.
ჟურნალისტ ინგა გრიგოლიას თქმით, ფაქტია, რომ ქვეყანაში არსებობს რეალური საფრთხე სერიოზული დაპირისპირების.
“პრეზიდენტთან ჩვენი შეხვედრის მთავარი მიზანი იყო ის, რომ ვსაუბრობდით გიორგი მარგველაშვილთან, რა როლი შეიძლება შეასრულოს მედიამ ამ დაპირისპირების თავიდან ასაცილებლად; რა უნდა გავაკეთოთ იმისთვის, რომ ეს დაპირისპირება კიდევ უფრო არ გაღრმავდეს, რომელიც ფაქტია, სახეზეა. ჩვენ გვქონდა საუბარი ასევე იმაზე, რას გულისხმობდა მარგველაშვილი დღევანდელ განცხადებაში სასამართლოსთან დაკავშირებით”, – განაცხადა ინგა გრიგოლიამ.
მისივე თქმით, სასამართლო პროცესი უნდა იყოს გამჭვირვალე.
“ამ შემთხვევაში არ არის საუბარი, შენ მოგწონს თუ არა რომელიმე მედიასაშუალება. ვისაც არ უნდა ამის აღიარება, მაინც უნდა ვთქვათ, რომ ქვეყანაში არის ძალიან რეალური საფრთხე დაპირისპირების და ვფიქრობ, ყველამ ყველაფერი უნდა გავაკეთოთ იმისთვის, რომ ეს დაპირისპირება თავიდან ავირიდოთ”, – განაცხადა გრიგოლიამ.
ასევე საფრთხეებზე საუბრობდა ჟურნალისტი ეკა მიშველაძე. მისი თქმით, დღეს რეალურად ქვეყანა არის დიდი საფრთხის წინაშე, ეს არის საფრთხე, რასაც ჰქვია სამოქალაქო დაპირისპირება და პრეზიდენტთან შეხვედრის ძირითადი თემა იყო ის, თუ როგორ ავიცილოთ თავიდან დაპირისპირება.
“ვთვლი, რომ ყველა პოლიტიკურმა ძალამ, მედიასაშუალებამ თავისთავში უნდა იპოვოს ის ძალა, რომ ამ ყველაფერს გაემიჯნოს და რაც მთავარია გადავდგათ კონკრეტული ნაბიჯები, რომ ქვეყანაში ეს სახიფათო ტენდენცია შეჩერდეს”, – განაცხადა ეკა მიშველაძემ.
