პროკურატურაში თანამდებობებზე დღემდე რჩებიან “ნაციონალური” ხელისუფლების პოლიტიკური დაკვეთის შემსრულებლები, – ამის შესახებ დღეს გამართულ ბრიფინგზე “გაერთიანებული დემოკრატიული მოძრაობის” პოლიტიკურმა მდივანმა გიგლა ბარამიძემ განაცხადა.
“ხალხი ელოდება სამართლიანობის აღდგენას, თუმცა რომელ სამართლიანობის აღდგენაზეა საუბარი, როდესაც მთავარი პროკურატურის საგამოძიებო ნაწილის უფროსის მოადგილედ კვლავ რჩება – ბესიკ თხელიძე ყოფილ სოდ-ზე ზედამხედველობის დეპარტამენტის კურატორი. შინაგან საქმეთა სამინისტროს ტერიტორიულ ორგანოებში საპროკურორო საქმიანობაზე ზედამხედველობის დეპარტამენტის უფროსის მოადგილედ ისევ მუშაობს გიორგი ფარულავა (ადეიშვილის პირველი მარჯვენა ხელი, აჭარის ყოფილი პროკურორი როინ შავაძის ცნობილი საქმის დროს) და კიდევ უამრავი ადამიანი, რომელიც არა მხოლოდ ინარჩუნებს, არამედ დაწინაურებულია 1 ოქტომბრის შემდეგ. მაგალითად, კვლავ განაგრძობენ საქმიანობას პოლიტპატიმარ ზვიად ბერაძისათვის საქმის შეკერვის ავტორები ქალბატონი თინა ჭურღულია (გლდანი-ნაძალადევის რაიონის პროკურატურა), ხოლო სალომე ჯანუაშვილი (საყვარელიძის და ღვინიაშვილის მარჯვენა ხელი) დაწინაურდა და გლდანი-ნაძალადევიდან მთავარ პროკურატურაში იქნა გადაყვანილი”, – განაცხადა გიგლა ბარამიძემ.
მისი თქმით, ქალაქის პროკურატურაში კვლავ განაგრძობენ მუშაობას პროკოფი ჭანკვეტაძე და დათო ხიზანაიძე. გიგლა ბარამიძის განცხადებით, ეს უკანასკნელი ის ერთადერთი პროკურორია, რომელმაც ნიღაბი გაიკეთა და ქალაქის სამმართველოს ეზოში 2009 წლის 6 მაისს ხალხს სცემდა სპეცრაზმელებთან ერთად, რისი მოწმეებიც არსებობენ.
“სწორედ მათ უკანონოდ დასდეს ბრალი და გაამწესეს საპყრობილეში შაქრო ზურაშვილი, რომელიც ცნობილი ამნისტიის საფუძველზე პოლიტპატიმრის სტატუსით განთავისუფლდა. შოთა რიჟამაძე ადამიანი, რომელიც სასჯელაღსრულებაზე ზედამხედველი პროკურორის თანამდებობაზე პატიმრების წამებებთან დაკავშირებით შესულ საჩივრებზე ყველა საქმეს წყვეტდა და დღეს მთავარ პროკურატურაში თავდაცვის, სასჯელაღსრულებისა და პრობაციის სამინისტროებში გამოძიების საპროცესო ხელმძღვანელობის დეპარტამენტის უფროსის მოადგილე გახლავთ. აღარაფერს ვამბობთ მთავარი პროკურატურის გენერალურ ინსპექციის მაშინდელ შემადგენლობაზე, რომელიც ყველა ბინძური და შეთითხნილი საქმის დამგვირგვინებელი გახლდათ. მაგალითად ზაზა ქარქუსაშვილი, გივი მჟავია და ძმანნი მათნი, იმის მაგივრად, რომ თანამდებობებიდან გაეთავისუფლებინათ, სხვადასხვა რაიონის პროკურორებად იქნენ გადანაწილებულნი და დღემდე “წარმატებით” განაგრძობენ მუშაობას, ხოლო ნიკა ბიწკინაშვილი იუსტიციის სამინისტროს გენერალური ინსპექციის უფროსად იქნა გადაყვანილი. სოსო ალავიძე (ე.წ. სიკვდილა) დღემდე პთავარი პროკურატურის კადრების დეპარტამენტის ერთ-ერთ წამყვან თანამდებობას იკავებს; ეს მხოლოდ მცირე ჩამონათვალია”, – განაცხადა გიგლა ბარამიძემ.
მისი თქმით, “სანამ “ქართული ოცნების” ხელისუფლება არ მიიღებს პოლიტიკურ გადაწყვეტილებას, რომ ამხილოს ყველა ის ადამიანი, ვინც მონაწილეობდა რეჟიმის ჩამოყალიბებაში, გაძლიერებაში, ასრულებდა პოლიტიკურ დაკვეთას და უდანაშაულო ადამიანებს სააკაშვილის ციხეში სატანჯველად ამწესებდა, ქვეყანაში სამართლიანობის დამკვიდრების პროცესი ვერ დაიწყება”.
