პრეზიდენტის ადმინისტრაცია სემეკის წევრობის კანდიდატების შესარჩევად კონსულტაციებს იწყებს. ენერგეტიკის მარეგულირებელ კომისიაში ორი წევრის პოსტი ვაკანტურია. გარდა ამისა, ერთ წევრს მიმდინარე წლის 5 ოქტომბერს ეწურება ვადა. სემეკის წევრობს კანდიდატები პრეზიდენტმა უნდა წარადგინოს, მათ შესარჩევად კონსულტაციები დღეს დაიწყო. კერძოდ, პრეზიდენტის მრჩეველი ეკონომიკურ საკითხებში გიორგი აბაშიშვილი ამ მიზნით ენერგეტიკისა და ეკონომიკის დარგის სპეციალისტებს ხვდება.
“მოგეხსენებათ, საქართველოს პრეზიდენტის პოზიცია არის ის, რომ იქ სადაც საქართველოს პრეზიდენტის მიერ უნდა იქნან კანდიდატურები წარდგენილი, წარდგენა მოხდეს სამოქალაქო საზოგადოების დარგის სპეციალისტებისა და ექსპერტების ჩართულობით. მსგავსი პროცესი ჩვენ გავიარეთ ეროვნული ბანკის საბჭოს წევრების წარდგენის დროს. ის იყო პირველი პრეცედენტი და შედარებით ბევრი დრო დაგვჭირდა, თუმცა ახლა მგონია გაცილებით უფრო სწრაფად შევძლებთ ღირსეული კანდიდატების წარდგენას”, – განაცხადა შეხვედრაზე პრეზიდენტის მრჩეველმა, გიორგი აბაშიშვილმა.
თავად ექსპერტები მიიჩნევენ, რომ სემეკის წევრობის კანდიდატი პროფესიონალიზმის ნიშნით უნდა იქნას შერჩეული.
როგორც შეხვედრის დაწყებამდე ჟურნალისტებს ექსპერტმა ენერგეტიკის საკითხებში დავით მირცხულავამ განუცხადა, ეს არის პირველი მსგავსი ტიპის შეხვედრა, რომელზეც საუბარი იქნება იმ პრინციპებზე, რომელიც საფუძვლად უნდა დაედოს კანდიდატის შერჩევას.
“ჩვენ საქმე გვაქვს ყველაზე მაღალ ინსტიტუციასთან ქვეყნის ენერგეტიკაში, რომელიც ასევე არეგულირებს წყლის საკითხებს. აქედან გამომდინარე, კანდიდატებს უნდა მივუდგეთ ძალიან დაკვირვებით და უნდა მოხდეს ძალიან მაღალი კლასის პროფესიონალების შერჩევა”, – განაცხადა დავით მირცხულავამ.
ექსპერტი ეკონომიკის საკითხებში ლევან კალანდაძე თავის მხრივ აცხადებს, რომ თავად პროცესი, როდესაც პრეზიდენტის ადმინისტრაცია დარგის სპეციალისტებთან კონსულტაციებს გადის, არის დადებითი და თავისთავად უზრუნველყოფს ამ პროცესის საჯაროობის მაღალ ხარისხს და გამჭვირვალობას.
