ფინანსთა მინისტრი ნოდარ ხადური იმედოვნებს, რომ ლარის კურსთან დაკავშირებით სიტუაცია მალე დასტაბილურდება.
“ეროვნული ბანკი და მთავრობის ეკონომიკური გუნდი მუშაობს ამასთან დაკავშირებით და მე იმედი მაქვს, რომ ძალიან მალე დასტაბილურდება სიტუაცია”, – ასე უპასუხა ხადურმა საქართველოს ეროვნული ვალუტის დევალვაციის საკითხზე მედიის მიერ დასმულ შეკითხვას.
ფინანსთა მინისტრმა მცირე კომენტარი გააკეთა, თბილისში სამხრეთ კავკასიაში ევროპის საინვესტიციო ბანკის წარმომადგენლობის ოფისის გახსნის საკითხზეც. მისი შეფასებით, თბილისი იბრუნებს რეგიონული ჰაბის ფუნქციას, რაც ძალიან მნიშვნელოვანია.
“თბილისში, სამხრეთ კავკასიაში ევროპის საინვესტიციო ბანკის ოფისი იმუშავებს, ის დაფარავს არა მხოლოდ საქართველოს, არამედ ზოგადად კავკასიას. მნიშვნელოვანია, რომ თბილისი იბრუნებს რეგიონული ჰაბის ფუნქციას, მათ შორის საბანკო სექტორში”, – აღნიშნა ნოდარ ხადურმა.
