კახა კახიშვილმა რუსეთ-საქართველოს ომში დაღუპული სპეცრაზმელების ოჯახის წევრებს სიმბოლური საჩუქრები გადასცა

სასჯელაღსრულებისა და პრობაციის მინისტრმა კახა კახიშვილმა 2008 წლის რუსეთ-საქართველოს ომში დაღუპული სპეცრაზმელების ოჯახის წევრებს სიმბოლური საჩუქრები გადასცა.
როგორც “თაიმერს” სასჯელაღსრულებისა და პრობაციის სამინისტროდან აცნობეს, კახა კახიშვილმა 2008 წლის რუსეთ-საქართველოს ომში დაღუპული პენიტენციური დეპარტამენტის სპეცდანიშნულების რაზმის წევრთა მემორიალი გვირგვინით შეამკო.
მინისტრმა 2008 წლის აგვისტოს ომის მძიმე შედეგებზე ისაუბრა და აღნიშნა, რომ ქართული სახელმწიფოებრიობის შენარჩუნება სწორედ ამ ადამიანების წყალობით მოხდა. კახა კახიშვილის განცხადებით, აგვისტოს ომის 7 წლისთავზე კიდევ უფრო მძაფრად ჩანს იმ ტრაგედიის შედეგები, რომელიც ომმა მოიტანა.
“ეს არის ძალიან მძიმე დღე მთელი საქართველოსთვის. ეს არის ერთ-ერთი ტრაგიკული დღე ჩვენი ქვეყნის ისტორიაში. 7 წლის წინ ძალიან დიდი უბედურება დაატყდა ჩვენს ქვეყანას, ომმა ბევრი ახალგაზრდის, ბევრი ჩვენი თანამოქალაქის სიცოცხლე შეიწირა. ჩვენ ვალდებულები ვართ არა მხოლოდ ამ დღეს, არამედ ყოველდღიურ რეჟიმში ვიზრუნოთ იმ ადამიანების ოჯახებზე, რომლებმაც სიცოცხლე შეწირეს ქვეყანას. ამავდროულად, რა თქმა უნდა, თითოეული ნაბიჯი უნდა იყოს გათვლილი იმისთვის, რომ ის რაც ჩვენ დავკარგეთ, დავიბრუნოთ”, – განაცხადა მინისტრმა.
უწყების ინფორმაციით. მემორიალის შემდეგ, სასჯელაღსრულებისა და პრობაციის მინისტრმა პენიტენციური დეპარტამენტის სპეცდანიშნულების რაზმის შემადგენლობა მინისტრის რანგში პირველად მოინახულა.
2008 წლის რუსეთ-საქართველოს ომის დროს პენიტენციური დეპარტამენტის სპეცდანიშნულების რაზმის 4 წარმომადგენელი დაიღუპა.
პენიტენციური დეპარტამენტის დაღუპულ სპეცრაზმელთა მემორიალთან მისვლამდე სასჯელაღსრულებისა და პრობაციის მინისტრი მუხათგვერდის ძმათა სასაფლაოზე მივიდა და 2008 წლის ომში გარდაცვლილთა ხსოვნას პატივი მიაგო.

banner
წინა სტატიაშიირაკლი ღარიბაშვილი ბაბუშერადან გადმოსვენებულთა პანაშვიდს დაესწრო
შემდეგი სტატიაირინა იმერლიშვილი – 2008 წლის ომი იყო ძალიან დიდი აგრესია რუსეთის მხრიდან